وفاقی وزیر اطلاعات عطاءاللہ تارڑ نے اسلام آباد میں چین کے نئے قمری سال اور موسم بہار کی تقریب سے خطاب کرتے ہوئے پاکستان اور چین کی تاریخی دوستی اور تعاون پر زور دیا۔
انہوں نے کہا کہ ون بیلٹ ون روڈ منصوبہ اور سی پیک پاکستان کی معیشت کے لیے اہمیت رکھتے ہیں اور اس کے ذریعے دونوں ممالک کے درمیان اقتصادی تعلقات مزید مستحکم ہوں گے۔عطاءاللہ تارڑ نے پاک چین دوستی کو ہمالیہ سے اونچی، سمندروں سے گہری اور شہد سے میٹھی قرار دیتے ہوئے اس کی اہمیت پر روشنی ڈالی۔ انہوں نے کہا کہ قراقرم شاہراہ پاک چین دوستی کی جیتی جاگتی مثال ہے، اور اس کے ذریعے گوادر تک پہنچنے کا سفر ایک سنگ میل کی حیثیت رکھتا ہے۔ وزیر اطلاعات نے مزید کہا کہ سی پیک کا پہلا مرحلہ مکمل ہو چکا ہے اور ہم دوسرے مرحلے کی طرف بڑھ رہے ہیں، جس میں گوادر ایئرپورٹ کا افتتاح اور پہلی پرواز کا لینڈ ہونا بھی ایک اہم پیشرفت ہے۔
انہوں نے کہا کہ چین کے مختلف شہروں میں جانے پر ہمیشہ اپنے ہونے کا احساس ہوتا ہے، اور چین اور پاکستان کے عوام کے درمیان گہرے تعلقات موجود ہیں۔ وفاقی وزیر نے اس بات پر زور دیا کہ پاک چین دوستی ہمیشہ قائم و دائم رہے گی اور دونوں ممالک کے عوام ایک دوسرے کی عزت کرتے ہیں۔آخر میں، عطاءاللہ تارڑ نے کہا کہ پاکستان اور چین ہمیشہ ایک دوسرے کے ساتھ کھڑے رہے ہیں، چاہے وقت اچھا ہو یا برا، اور پاک چین دوستی کی مضبوطی میں ہمیشہ اپنا کردار ادا کرتے رہیں گے۔
