انسداد دہشت گردی عدالت لاہور میں 9 مئی کے واقعات سے متعلق پانچ مقدمات کی سماعت ہوئی، جس میں پی ٹی آئی کی اہم رہنماؤں ڈاکٹر یاسمین راشد، عمر سرفراز چیمہ، میاں محمود الرشید سمیت دیگر ملزمان کو پیش کیا گیا۔
عدالت میں سماعت کے دوران جج ارشد جاوید نے پولیس کو ملزمان کو چالان فراہم کرنے کا حکم دیا۔پولیس نے ان ملزمان کے خلاف مختلف تھانوں میں مقدمات درج کر رکھے ہیں، جن میں گلبرگ اور ماڈل ٹاؤن کے تھانے شامل ہیں۔ سماعت کے دوران، ملزمان کو جیل سے عدالت لایا گیا اور ان کی حاضری مکمل کی گئی۔ ملزمان کی جانب سے ایڈووکیٹ برہان معظم عدالت میں پیش ہوئے۔عدالت نے چالان فراہم کرنے کے بعد سماعت 6 دسمبر تک ملتوی کر دی۔ پولیس کی جانب سے یہ مقدمات 9 مئی کے دوران ہونے والے پرتشدد واقعات، جلاؤ گھیراؤ اور دیگر مظاہروں سے متعلق ہیں، جن میں سرکاری املاک اور پولیس اہلکاروں کو نشانہ بنایا گیا تھا۔یہ کارروائی اس وقت کی جارہی ہے جب ملک بھر میں 9 مئی کے بعد کے حالات پر بحث جاری ہے اور مختلف رہنماؤں کے خلاف مقدمات درج کیے جا رہے ہیں۔
