چھانگامانگا :تیز رفتار بس کی رکشے کو ٹکر، 2 طالبات جاں بحق، 6 افراد زخمی

 حادثے  میںجاں بحق طالبات کی شناخت ایمن فاطمہ اور مبشرہ کے ناموں سے ہوئی
 طالبات کے سروں پر چوٹیں آئیں،4 طالبات کی حالت تشویشناک ، جناح ہسپتال لاہور ریفر
چھانگا مانگا،چونیاں(‘نامہ نگار،تحصیل رپورٹر )  چھانگامانگا میںتیز رفتار فیکٹری بس کی رکشے کو ٹکر کے نتیجے میں نویں جماعت کا پرچہ دینے  کیلئے  جانے والی 2 طالبات جاں بحق ہو گئیں جبکہ 5 دیگر طالبات سمیت 6 افراد زخمی ہو گئے۔ریسکیو حکام کے مطابق طالبات رکشے میں نویں جماعت کا امتحان دینے سینٹر جا رہی تھیں کہ اس دوران فیکٹری بس نے ان کے رکشے کو ٹکر مار دی۔ حکام نے بتایا کہ حادثے میں 7 طالبات سمیت 8 افراد زخمی ہوئے، بیشتر طالبات کے سروں پر چوٹیں آئیں، زخمی 4 طالبات کی حالت تشویشناک بنائی جا رہی تھی جنہیں جناح اسپتال لاہور ریفر کر دیا گیا۔بعد ازاں اسپتال انتظامیہ نے بتایا کہ علاج کے لیے لائی گئیں 2 زخمی طالبات دم توڑ گئیں، جاں بحق طالبات کی شناخت ایمن فاطمہ اور مبشرہ کے ناموں سے ہوئی ہے۔