پنجاب کی بٹھنڈہ عدالت نے معروف بھارتی اداکارہ اور سیاستدان کنگنا رناوت کی 2021 کے ہتکِ عزت کے کیس میں ضمانت منظور کر لی ہے۔
یہ مقدمہ کسان احتجاج کے دوران کسان خاتون مہیندر کور کی جانب سے دائر کیا گیا تھا، جنہوں نے الزام لگایا تھا کہ کنگنا نے ایک ٹویٹ کے ذریعے ان کی ساکھ کو نقصان پہنچایا۔عدالت کی سماعت کے دوران، کنگنا رناوت نے میڈیا کے سامنے کہا کہ ان کے سوشل میڈیا بیانات سے پیدا ہونے والی غلط فہمی پر انہیں افسوس ہے اور انہوں نے کسی شخص کے خلاف براہِ راست تبصرہ نہیں کیا تھا۔ انہوں نے مزید کہا کہ ان کی پوسٹ ایک میم کی صورت میں ری ٹویٹ تھی، جس میں کئی خواتین کی تصاویر شامل تھیں، اور اس کا مقصد کسی کی بےعزتی کرنا نہیں تھا۔ انہوں نے یہ بھی کہا کہ وہ معافی مانگنے کا بھی ارادہ رکھتی ہیں۔
مہیندر کور کے وکیل رغوبیر سنگھ بینیوال نے تصدیق کی کہ عدالت نے کنگنا کی ضمانت ان کے والد کی ضمانتی بانڈ پر منظور کی ہے۔ یاد رہے کہ 2021 میں، کنگنا پر الزام عائد کیا گیا تھا کہ انہوں نے اپنی پوسٹ میں دعویٰ کیا تھا کہ یہ خاتون شاہین باغ مظاہرے میں بھی شریک تھیں، جسے مہندر کور نے اپنی عزت و وقار کے خلاف قرار دیا تھا اور ہتک عزت کی شکایت درج کرائی تھی۔
