کراچی : سندھ کے سینئر وزیر شرجیل انعام میمن نے 28 مئی یومِ تکبیر کے موقع پر اپنے پیغام میں کہا ہے کہ پاکستان نے 1998ء میں ایٹمی دھماکے کرکے دنیا کو یہ واضح پیغام دیا کہ ہم ایک خود مختار اور ناقابلِ تسخیر قوم ہیں۔
قوم کو مبارکباد اور بانیوں کو خراجِ عقیدت
شرجیل میمن نے کہا کہ وہ یومِ تکبیر پر پوری قوم کو دلی مبارکباد پیش کرتے ہیں اور اس عظیم دن کے معماروں کو خراجِ عقیدت پیش کرتے ہیں، خصوصاً شہید ذوالفقار علی بھٹو جنہوں نے ایٹمی پروگرام کی بنیاد رکھی اور شہید محترمہ بینظیر بھٹو جنہوں نے اس وژن کو آگے بڑھاتے ہوئے ملک کو میزائل ٹیکنالوجی سے لیس کیا۔
ناقابلِ فراموش کردار
شرجیل میمن کے مطابق، پاکستان کے دفاع کو ناقابلِ تسخیر بنانے میں بھٹو خاندان کا کردار ناقابلِ فراموش ہے۔ ان کا کہنا تھا کہ "یہ دن نہ صرف ہمارے دفاع کی مضبوطی کی علامت ہے بلکہ ہماری سیاسی قیادت کی دور اندیشی اور قربانیوں کا بھی ثبوت ہے۔"
تاریخی پس منظر
واضح رہے کہ 28 مئی 1998ء کو پاکستان نے بلوچستان کے علاقے چاغی میں ایٹمی دھماکے کر کے بھارت کے پانچ ایٹمی دھماکوں کا بھرپور جواب دیا تھا۔ اس دن کو یومِ تکبیر کے طور پر منایا جاتا ہے جو پاکستان کے جوہری طاقت بننے کی علامت ہے۔یہ دن اس بات کی یاد دہانی بھی ہے کہ پاکستان نے خطے میں طاقت کا توازن قائم کیا اور اپنے دفاع کا حق منوایا۔
