ملک بھر میں بڑھتی ہوئی مہنگائی کے دوران برائلر گوشت کی قیمتوں میں مسلسل اضافہ دیکھا جا رہا ہے، جس کے نتیجے میں یہ بیف کی قیمت کے قریب پہنچ چکی ہے۔
حالیہ اضافے کے مطابق برائلر گوشت کی قیمت میں 8 روپے فی کلو اضافہ ہوا ہے اور یہ اب 577 روپے فی کلو تک جا پہنچی ہے، جبکہ صاف گوشت 677 روپے فی کلو پر فروخت ہو رہا ہے۔ذرائع کے مطابق زندہ برائلر کی قیمتیں بھی بڑھ گئی ہیں، فارم ریٹ 370 روپے فی کلو اور فارمرز سپلائی 385 روپے فی کلو پر کر رہے ہیں۔ تھوک سطح پر سرکاری ریٹ 384 روپے مقرر ہونے کے باوجود فروخت 401 روپے فی کلو ہو رہی ہے، اور پرچون میں 398 روپے کے مقابلے میں 413 روپے فی کلو تک فروخت جاری ہے۔
شہریوں نے تشویش کا اظہار کرتے ہوئے کہا کہ مٹن اور بیف پہلے ہی مہنگے تھے اور اب برائلر گوشت بھی عام آدمی کی پہنچ سے دور ہوتا جا رہا ہے۔ادارہ جاتی طور پر سرکاری نرخ نامے جاری کیے جا رہے ہیں، مگر ناکافی عملدرآمد اور مارکیٹ میں زائد قیمتوں کی وجہ سے شہریوں کو مشکلات کا سامنا ہے، جس پر مؤثر نگرانی اور سخت کارروائی کی ضرورت ہے۔
