یکم اپریل سے پیٹرولیم مصنوعات کی قیمتوں میں کمی کا امکان ہے، جس کے تحت پیٹرول اور ڈیزل کی قیمتوں میں تقریباً 2 روپے فی لیٹر کمی متوقع ہے۔
تیل کمپنیوں کے ذرائع کے مطابق عالمی مارکیٹ میں تیل کی قیمتوں میں کمی کے اثرات پاکستان پر بھی نظر آئیں گے، جس کے باعث یہ کمی ہو سکتی ہے۔ تاہم، قیمتوں میں کمی کی تصدیق حکومتی اعلامیہ کے بعد ہی کی جائے گی۔اس کے ساتھ ہی وفاقی وزیر خزانہ محمد اورنگزیب نے چین کے باؤ فورم کے دوران ایک غیر ملکی جریدے کو انٹرویو دیتے ہوئے کہا کہ وزیرِاعظم شہباز شریف کی قیادت میں بجلی کی قیمتوں میں کمی لانے کے اقدامات کیے جا رہے ہیں۔ محمد اورنگزیب کا کہنا تھا کہ اس فیصلے سے خاص طور پر مینوفیکچرنگ سیکٹر کو فروغ ملے گا اور ملک کی برآمدات میں اضافہ ہوگا۔
انہوں نے مزید کہا کہ حکومت کی توجہ معیشت کو بہتر بنانے اور معاشی استحکام کے حصول پر مرکوز ہے، اور وزیرِاعظم کی قیادت میں یہ اقدامات کیے جا رہے ہیں تاکہ ملک کی اقتصادی صورتحال کو بہتر بنایا جا سکے۔ وزیر خزانہ نے مزید بتایا کہ بجلی کی قیمتوں میں کمی سے عوام کو بھی ریلیف ملے گا اور یہ اقدامات ملک کی مجموعی ترقی کے لیے اہم ثابت ہوں گے۔یہ دونوں اقدامات پیٹرولیم مصنوعات اور بجلی کی قیمتوں میں کمی، ملک کی معاشی پالیسیوں کے تحت کیے جا رہے ہیں، جس کا مقصد مہنگائی کو کم کرنا اور معاشی ترقی کے عمل کو مزید مستحکم کرنا ہے۔
