پی ٹی آئی کے مرکزی سیکریٹری اطلاعات شیخ وقاص اکرم نے وزیرِ اعظم کی ترقی کی تعریف پر کڑی تنقید کرتے ہوئے کہا کہ وزیرِ اعظم کو اپنی ترقی کی تعریفوں کو دوبارہ درست کر لینا چاہیے،
کیونکہ جب ایک سال میں 18 لاکھ پاکستانی شہری ملک چھوڑ کر جا چکے ہیں، تو ایسا دعویٰ کیسے کیا جا سکتا ہے کہ ملک ترقی کر رہا ہے؟ شیخ وقاص اکرم نے مزید کہا کہ عالمی سطح پر پاکستان کی جگ ہنسائی ہو رہی ہے اور عوامی مینڈیٹ چوری کرنے والی حکومت کیسے ملک کو ترقی کی راہ پر گامزن کر سکتی ہے۔شیخ وقاص اکرم نے حکومت کی خارجہ پالیسی پر بھی تنقید کی اور کہا کہ امریکی صدر کی تقریبِ حلف برداری میں پاکستانی وزراء کی شرکت اور ان کا برتاؤ اس بات کا واضح ثبوت ہے کہ حکومت کی بیرون ملک پوزیشن کمزور ہو چکی ہے۔ انہوں نے کہا کہ حکومت نے عوامی مینڈیٹ چوری کر کے 'فارم 47' کے ذریعے حکومت تشکیل دی، اور اب مذاکرات سے گریز کر رہی ہے۔ ان کا کہنا تھا کہ مذاکرات کے آغاز سے ہی حکومت کا رویہ منافقانہ تھا۔
پی ٹی آئی رہنما نے مزید کہا کہ حکومت کو صرف ایک ملاقات کرنے کے لیے ہفتے لگ گئے، جو اس بات کا اشارہ ہے کہ حکومت بے بس اور غیر مؤثر ہو چکی ہے۔ انہوں نے کہا کہ جب تک ملک میں حقیقی نمائندگی نہ ہو، تب تک معیشت میں ترقی ممکن نہیں ہو سکتی۔شیخ وقاص اکرم نے یہ بھی کہا کہ پی ٹی آئی کو حقیقی آزادی کی جدوجہد کے لیے کسی کی اجازت کی ضرورت نہیں ہے۔ ان کا کہنا تھا کہ جو بھی پی ٹی آئی کو حقیقی آزادی کی جدوجہد سے روکتا ہے، وہ ملک کا دشمن ہے۔ انہوں نے اس بات پر زور دیا کہ پاکستان کو حقیقی جمہوری قوتوں کی ضرورت ہے تاکہ ملک میں ایک مضبوط اور جمہوری حکومت قائم ہو سکے۔
