بالی ووڈ کے سپر اسٹار شاہ رخ خان کے لیے نئے سال کے حوالے سے کی جانے والی پیشگوئیاں ان کے کیریئر اور ذاتی زندگی کے لیے کچھ مشکلات کا عندیہ دے رہی ہیں۔
بھارت کی مشہور ٹیرو کارڈ ریڈر رہنی سبروال نے اپنی پیشگوئیوں میں کہا ہے کہ شاہ رخ خان 2021 سے کیریئر، صحت، اور بچوں کے حوالے سے ایک منفی دور میں داخل ہوچکے ہیں، اور انہیں نئے سال میں اپنے جذباتی اتار چڑھاؤ اور صحت پر زیادہ توجہ دینے کی ضرورت ہے۔رہنی سبروال نے شاہ رخ خان کی نیومیرولوجی کو بھی بیان کیا، کہ ان کے علم جفر میں 2 نمبر کا بہت اثر ہے، جو ان کی انڈسٹری میں کامیابی کا راز بن چکا ہے، اور ان کے ساتھ گوری خان کی قسمت کا توازن بھی ہے جو ان کی کامیابی میں اہم کردار ادا کرتا ہے۔ تاہم، 2025 میں شاہ رخ خان کے لیے بچوں کے کیریئر پر توجہ دینے کا وقت آ سکتا ہے، جبکہ بالی ووڈ میں مارچ کے بعد اچانک اتار چڑھاؤ آ سکتا ہے، جو ان کے کیریئر کو متاثر کرسکتا ہے۔
رہنی نے شاہ رخ خان کو صحت کے حوالے سے بھی متنبہ کیا ہے کہ اس سال انہیں اپنی صحت پر زیادہ دھیان دینا ہوگا۔ ساتھ ہی، انہوں نے مشورہ دیا کہ شاہ رخ خان اپنی رہائش گاہ "منت" کے واستو میں تبدیلیاں کریں تاکہ یہ ان کے بچوں سہانا، آریان، اور ابرام کے لیے زیادہ موافق بن سکے۔یہ پیشگوئیاں ٹیرو کارڈ ریڈر کے ذریعے کی گئی ہیں، اور اگرچہ یہ مستقبل کے حوالے سے اندازہ فراہم کرتی ہیں، لیکن ضروری نہیں کہ یہ سو فیصد درست ہوں۔
