بھارتی فلم و ٹیلی ویژن کے سینئر اداکار بھرت کپور 80 سال کی عمر میں انتقال کر گئے۔
بھارتی میڈیا کے مطابق بھرت کپور پیر کے روز دوپہر ممبئی میں اپنے گھر پر مختصر علالت کے بعد انتقال کر گئے۔ ان کے قریبی ساتھی اداکار اوتّر گل نے ان کے انتقال کی تصدیق کی، جبکہ آخری رسومات شام کو اہلِ خانہ اور قریبی دوستوں کی موجودگی میں ادا کی گئیں۔بھرت کپور نے 1972 میں اپنے فنی کیریئر کا آغاز کیا اور تقریباً چار دہائیوں تک ہندی فلم انڈسٹری میں سرگرم رہے۔ وہ زیادہ تر معاون اور منفی کرداروں کے لیے پہچانے جاتے تھے۔اپنے کیریئر میں انہوں نے متعدد معروف فلموں میں اداکاری کی جن میں نوکری، رام بلرام، لو اسٹوری، بازار، غلامی، آخری راستہ، ستیہ میو جیتے، سوگ، خدا گواہ اور رنگ شامل ہیں۔
فلموں کے ساتھ ساتھ بھرت کپور نے ٹیلی ویژن پر بھی نمایاں کام کیا، جن میں کیمپس، پرمپرہ، راحت، سانس، امانت، تارا، چناوتی اور کہانی چندرکانتا کی جیسے مقبول ڈرامے شامل ہیں۔بھرت کپور کی طویل فنی خدمات اور متنوع کرداروں میں اداکاری نے انہیں بھارتی انٹرٹینمنٹ انڈسٹری میں ایک منفرد مقام اور پہچان عطا کی۔
