نوشکی: بلوچستان کے ضلع نوشکی میں انسداد پولیو ٹیم کی سیکیورٹی پر فائرنگ کے واقعے پر صدر مملکت آصف علی زرداری اور وزیراعظم شہباز شریف نے شدید مذمت کی ہے۔
واقعے میں ایک پولیس اہلکار شہید اور ایک زخمی ہوا، جس کے بعد ضلع میں پولیو مہم عارضی طور پر روک دی گئی ہے۔
صدر مملکت آصف علی زرداری کا بیان:
صدر زرداری نے شہید پولیس اہلکار کے اہلِ خانہ سے دلی تعزیت کا اظہار کرتے ہوئے کہا کہ:"پولیو کے خلاف جنگ ابھی ختم نہیں ہوئی۔ ہم اس وقت تک چین سے نہیں بیٹھیں گے جب تک ملک سے پولیو کا مکمل خاتمہ نہ کر لیں۔"انہوں نے پولیو مہم میں شریک عملے اور سیکیورٹی اہلکاروں کے حوصلے اور قربانیوں کو خراجِ تحسین پیش کیا۔
وزیراعظم شہباز شریف کا ردعمل:
وزیراعظم نے واقعے کو انتہائی افسوسناک قرار دیتے ہوئے کہا:"بچوں کا مستقبل محفوظ بنانے والی پولیو ٹیم پر حملہ ناقابل برداشت ہے۔"انہوں نے متعلقہ حکام کو ہدایت کی کہ پولیو مہم کے خلاف سرگرم شرپسند عناصر سے سختی سے نمٹا جائے اور ایسی بزدلانہ کارروائیوں کا مؤثر جواب دیا جائے۔
واقعے کی تفصیلات:
واقعہ نوشکی کے علاقے کلی محمد حسنی میں پیش آیا، جہاں انسداد پولیو ٹیم کی سیکیورٹی پر معمور پولیس اہلکاروں پر فائرنگ کی گئی۔پولیس کے مطابق شہید اہلکار کی لاش کو ضابطے کی کارروائی کے بعد اسپتال منتقل کر دیا گیا، جبکہ حملہ آوروں کی تلاش جاری ہے۔
پولیو مہم معطل:
ڈسٹرکٹ ہیلتھ آفیسر کے مطابق واقعے کے بعد حفاظتی اقدامات کے تحت ضلع نوشکی میں جاری انسداد پولیو مہم کو عارضی طور پر معطل کر دیا گیا ہے۔واقعے نے ایک بار پھر پولیو ورکرز اور ان کی سیکیورٹی کو درپیش خطرات کو اجاگر کیا ہے، جبکہ ریاستی سطح پر اس کے خلاف عزم کا اعادہ کیا جا رہا ہے۔
