اسلام آباد: ملک میں ہفتہ وار مہنگائی میں 0.97 فیصد اضافہ ریکارڈ کیا گیا ہے، جس کے بعد مجموعی سالانہ مہنگائی کی شرح 8.24 فیصد تک پہنچ گئی ہے۔
یہ اعداد و شمار وفاقی ادارہ شماریات کی تازہ ترین رپورٹ میں جاری کیے گئے ہیں۔رپورٹ کے مطابق ایک ہفتے کے دوران 23 اشیائے ضروریہ کی قیمتوں میں اضافہ ہوا، جبکہ 6 اشیاء سستی ہوئیں اور 22 کی قیمتیں مستحکم رہیں۔
قیمتوں میں نمایاں اضافہ:
سبزیوں میں پیاز 18.10 فیصد اور ٹماٹر 11.38 فیصد مہنگا ہوا۔
آلو کی قیمت میں 8.11 فیصد اضافہ ریکارڈ کیا گیا۔
چکن کی قیمت میں 8.70 فیصد اضافہ ہوا۔
توانائی اور روزمرہ کی اشیاء کی قیمتیں بھی بڑھی، جن میں ایل پی جی 10.05 فیصد مہنگا ہوا اور پہلی سہ ماہی میں بجلی کے چارجز 6.11 فیصد بڑھ گئے۔
انڈے، لہسن، مٹن، بیف اور جلانے والی لکڑی کی قیمتوں میں بھی اضافہ دیکھا گیا۔
کچھ اشیاء کی قیمتوں میں کمی:
کیلے 4.50 فیصد اور آٹے 1 فیصد سستے ہوئے۔
چینی، گڑ اور چاول کی قیمتوں میں بھی کمی دیکھی گئی۔
ماہرین کے مطابق مہنگائی میں یہ اضافے عوام پر روزمرہ کے اخراجات کا بوجھ بڑھا سکتے ہیں، خاص طور پر بنیادی خوراک اور توانائی کی اشیاء کی قیمتوں میں اضافہ شہریوں کی خریداری کی طاقت متاثر کر سکتا ہے۔
