وفاقی وزیر اطلاعات عطاء اللہ تارڑ نے کہا ہے کہ افغان جارحیت کے جواب میں پاکستان کی جانب سے شروع کیے گئے آپریشن غضب للحق میں افغان طالبان رجیم کو بھاری نقصان پہنچا ہے۔
اپنے ایک تازہ بیان میں، انہوں نے سوشل میڈیا پلیٹ فارم ایکس پر بتایا کہ کارروائیوں میں 133 کارندوں کی ہلاکت اور 200 سے زائد کے زخمی ہونے کی تصدیق ہوئی ہے۔ یہ کارروائیاں کابل، پکتیا، اور قندھار میں دفاعی اہداف کو نشانہ بناتے ہوئے انجام دی گئی ہیں، جہاں مزید ہلاکتوں کا امکان ظاہر کیا جا رہا ہے۔عطاء اللہ تارڑ کے مطابق، آپریشن کے دوران افغان طالبان رجیم کی 27 پوسٹیں تباہ کی گئی ہیں، اور 9 پوسٹوں پر قبضہ بھی کیا گیا ہے۔ انہوں نے بتایا کہ پاک فضائیہ کے طیاروں نے دو کور ہیڈکوارٹرز، تین بریگیڈ ہیڈکوارٹرز، دو ایمونیشن ڈپو، ایک لاجسٹک بیس، تین بٹالین ہیڈکوارٹرز، اور دو سیکٹر ہیڈکوارٹرز کو تباہ کر دیا ہے۔ اس کے علاوہ، 80 سے زائد ٹینک، آرٹلری گنز، اور اے پی سیز بھی تباہ کیے گئے ہیں۔ یہ کارروائیاں پاکستان کی دفاعی طاقت اور علاقائی سلامتی کے لیے ایک اہم اور فیصلہ کن اقدام ہیں۔
