وزیراعظم محمد شہباز شریف نے فیلڈ مارشل عاصم منیر کے ہمراہ امریکی صدر ڈونلڈ ٹرمپ سے وائٹ ہاؤس میں ملاقات کی۔
ملاقات خوشگوار ماحول میں ہوئی، جس میں خطے کے امن، باہمی تعلقات اور اقتصادی تعاون پر تبادلہ خیال کیا گیا۔وزیراعظم نے صدر ٹرمپ کو تنازعات کے خاتمے کے لیے مخلصانہ کوششوں پر امن کا داعی قرار دیا اور پاکستان اور بھارت کے درمیان جنگ بندی میں ان کی "دلیرانہ اور فیصلہ کن قیادت" کو سراہا، جس سے جنوبی ایشیا ایک بڑے سانحے سے بچ گیا۔
غزہ کی صورتحال پر گفتگو
وزیراعظم نے غزہ میں جنگ بندی کے لیے صدر ٹرمپ کی کوششوں کو سراہا۔انہوں نے خاص طور پر ٹرمپ کی اس پہل کا ذکر کیا جس کے تحت نیویارک میں مسلم دنیا کے رہنماؤں کو مدعو کیا گیا تاکہ غزہ اور مغربی کنارے میں امن بحالی کے لیے حکمتِ عملی پر بات ہو سکے۔
پاک-امریکہ تعلقات اور معاہدے
وزیراعظم نے رواں سال طے پانے والے ٹیرف (محصولات) معاہدے پر صدر ٹرمپ کا شکریہ ادا کیا۔امریکی کمپنیوں کو پاکستان کے زراعت، آئی ٹی، معدنیات اور توانائی کے شعبوں میں سرمایہ کاری کی دعوت دی۔وزیراعظم نے امید ظاہر کی کہ صدر ٹرمپ کی قیادت میں پاک-امریکہ تعلقات مزید مضبوط ہوں گے۔
سکیورٹی اور دہشت گردی کے خلاف تعاون
ملاقات میں علاقائی سکیورٹی اور انسدادِ دہشت گردی پر بات ہوئی۔وزیراعظم نے اس شعبے میں پاکستان کے کردار کو امریکی صدر کی عوامی توثیق پر ان کا شکریہ ادا کیا۔انٹیلی جنس اور سکیورٹی تعاون مزید بڑھانے کی ضرورت پر زور دیا گیا۔آخر میں وزیراعظم شہباز شریف نے صدر ٹرمپ کو پاکستان کے سرکاری دورے کی دعوت دی۔
