وزیراعلیٰ خیبرپختونخوا علی امین گنڈاپور نے کہا ہے کہ خیبرپختونخوا کی حکومت نے اپنے طور پر صوبائی بجٹ پیش کرکے اسے اسمبلی سے منظور کرا لیا ہے کیونکہ مرکز سے کسی قسم کا تعاون نہیں ملا۔
انہوں نے کہا کہ "پیٹرن انچیف" یعنی عمران خان کا آئینی حق ہے کہ بجٹ کی منظوری سے قبل وہ اپنی رائے دے سکیں، مگر انہیں ہم سے ملنے کی اجازت نہیں دی جا رہی۔راولپنڈی میں میڈیا سے گفتگو کرتے ہوئے گنڈاپور نے کہا کہ ملک میں نہ قانون بچا ہے، نہ آئین کی پاسداری ہو رہی ہے۔ "ادارے اور نظام غلط ڈگر پر چل رہے ہیں، عدلیہ بھی آزاد نہیں رہی۔"انہوں نے کہا کہ خیبرپختونخوا میں بھی مینڈیٹ چوری کرنے کی کوشش کی گئی، مگر وہ "زور بازو سے" اپنا مینڈیٹ بچانے میں کامیاب ہوئے۔ "ہم نے عدالتی احکامات کے مطابق پارٹی کی فہرست میں نام دیا اور اسمبلی آئے، مگر ہمیں روکنے کے لیے ایسا سلوک کیا گیا جیسے ہم دہشت گرد ہوں۔"
"بانی سے ملاقات تو ہو ہی جائے گی"
وزیراعلیٰ نے کہا کہ انہیں عمران خان سے دو دو ماہ تک ملنے کی اجازت نہیں دی گئی۔ "یہ طریقہ غلط ہے۔ جس آئین کی پاسداری کرنی ہے، اسی کو روندا جا رہا ہے۔"انہوں نے کہا کہ یہ ملاقات نہ کروانا "بے ظرفی" کی نشانی ہے۔ "یہ حکومت بانی کی ہے، اور ہمیں ان کے مینڈیٹ کا تحفظ کرنا ہے۔"
"فائنانس میٹنگز کا بائیکاٹ کر رکھا ہے"
علی امین گنڈاپور نے کہا کہ انہوں نے تمام فائنانس میٹنگز کا بائیکاٹ کر رکھا ہے۔ "ہمارا آئینی حق ہم سے چھینا جا رہا ہے، احتجاج پر گولیاں ماری جا رہی ہیں۔ ایک بندہ مجھے گولی مارے تو میں کیا کروں؟ میرا آئین اور میرا دین مجھے کیا کہتا ہے؟"انہوں نے کہا کہ "ابھی عشق کے امتحان اور بھی ہیں۔" انہوں نے اشارہ دیا کہ آئی ایم ایف کے ساتھ بھی ایک نیا پروگرام آ رہا ہے، اور اس میں بھی "ہمارا رویہ وہی ہوگا"۔
"سپریم کورٹ میں بھی معاملہ اٹھایا ہے"
انہوں نے کہا کہ سپریم کورٹ میں سی ایم اے (درخواست) جمع کرا دی گئی ہے۔ "خان صاحب نے چیف جسٹس کو خط لکھا تھا، اب دیکھنا یہ ہے کہ اس پر کیا کارروائی ہوتی ہے۔"
"کیا مریم نواز ہی اصل میں حکومت چلا رہی ہیں؟"
وزیراعلیٰ نے سوال اٹھایا کہ کیا مریم نواز صاحبہ کی حکومت ہے؟ "اگر نہیں ہے تو واضح کریں۔" انہوں نے کہا کہ ہوم ڈیپارٹمنٹ کس حد تک خودمختار ہے، اور یہ کس کے ماتحت ہے؟
"سیشن ابھی مکمل نہیں ہوا"
انہوں نے واضح کیا کہ خیبرپختونخوا اسمبلی کا بجٹ اجلاس ابھی جاری ہے اور تمام ایم پی ایز آج اسلام آباد ہائیکورٹ میں موجود تھے، جس سے نظام متاثر ہوا ہے۔ "مگر ہم ہر قدرتی آفت کے لیے تیار رہتے ہیں۔"
"بانی کا پابند ہوں"
علی امین گنڈاپور نے کہا کہ وہ عمران خان کو اپنا قائد مانتے ہیں اور انہیں دیے گئے اختیارات کے مطابق عمل کر رہے ہیں۔ "تن من دھن سے ان کے لیے کام کر رہا ہوں، باقی اللہ کی رضا۔"
