راولپنڈی میں پریس کانفرنس سے خطاب کرتے ہوئے وفاقی وزیر ریلوے حنیف عباسی نے کہا کہ بھارت اس وقت پوری دنیا میں ایک عالمی دہشت گرد کے طور پر ابھرا ہے۔
انہوں نے کہا کہ سندھ طاس معاہدے کے وقت بھارت نے خوشیاں منائی تھیں لیکن آج بھارت کے لیے "سندھ طاس معاہدہ نشانہ ہے اور پہلگام بہانہ ہے۔"
فلسطین سے اظہار یکجہتی
حنیف عباسی نے تاجر برادری کے فلسطین سے اظہار یکجہتی کے لیے کیے گئے شٹر ڈاؤن کا خیر مقدم کرتے ہوئے کہا کہ یہ ایک قابلِ تحسین اقدام ہے اور پوری قوم فلسطینیوں کے ساتھ کھڑی ہے۔
بھارت اور اسرائیل پر سخت تنقید
وزیر ریلوے نے بھارت کو تنقید کا نشانہ بناتے ہوئے کہا کہ بھارت نے پاکستان کو کاغذی کارروائیوں میں دہشت گرد بنا کر پیش کرنے کی کوشش کی ہے، جبکہ دنیا کا سب سے بڑا دہشت گرد اسرائیل ہے۔ انہوں نے کہا کہ بھارت کے ہاتھوں ایک لاکھ کشمیری شہید ہوچکے ہیں، اور نریندر مودی کشمیر، بہار، گجرات، عیسائیوں اور سکھوں کے قتل عام میں براہِ راست ملوث ہے۔
بلوچستان اور کینیڈا میں دہشت گردی میں بھارت کا ہاتھ
حنیف عباسی نے کہا کہ بھارت پاکستان کے صوبہ بلوچستان میں دہشت گردی کو فروغ دے رہا ہے اور کینیڈا میں سکھوں کے قتل میں بھی ملوث ہے۔
بھارت کی داخلی صورتِ حال
انہوں نے دعویٰ کیا کہ بھارت میں اس وقت 1500 سے زائد طلبا کو یونیورسٹیوں اور کالجز سے اٹھا لیا گیا ہے اور انہیں فیک انکاؤنٹرز کے لیے مختلف جگہوں پر منتقل کیا جا رہا ہے۔
ابھی نندن کا تذکرہ
حنیف عباسی نے کہا کہ جب بھارتی پائلٹ ابھی نندن گرفتار ہوا تو کشمیر کے بچوں نے اسے ٹھڈے مارے تھے، لیکن ہماری حکومت نے اسے چائے پلا کر عزت سے واپس بھیجا۔
مودی کی فالس فلیگ کارروائیاں
انہوں نے سوال اٹھایا کہ 8 لاکھ بھارتی فوجیوں کی موجودگی میں پہلگام میں تین دہشت گرد کیسے داخل ہو گئے؟ انہوں نے کہا کہ مودی سرکار جھوٹے حملے کرا کے پاکستان پر الزام تراشی کرتی ہے، جیسے جعفر ایکسپریس کے واقعے میں میڈیا نے منٹوں میں 800 تابوتوں کی جھوٹی خبر دی تھی۔
کشمیر میں مسلمانوں پر مظالم
وزیر ریلوے نے کہا کہ کشمیر میں ہندو بستیاں بسانے کے لیے مسلمانوں کی زمینیں چھینی جا رہی ہیں اور تجاوزات کے نام پر ظلم کیا جا رہا ہے۔
سندھ طاس معاہدہ اور پانی کی جنگ کی دھمکی
حنیف عباسی نے واضح الفاظ میں کہا کہ اگر بھارت نے پاکستان کا پانی بند کیا تو "ہم تمہاری سانس بند کر دیں گے۔" انہوں نے کہا کہ پاکستان کے پاس غوری، شاہین اور غزنوی جیسے میزائل بھارت کے لیے تیار ہیں اور بھارت ہماری میزائل طاقت سے بخوبی واقف ہے۔
پاکستانی فضائی حدود کی بندش
انہوں نے یاد دلایا کہ پاکستان نے بھارت کی فضائی حدود بند کی تھی جس پر بھارتی کمپنیوں کی چیخیں نکل گئیں تھیں اور جلد ہی بین الاقوامی کمپنیاں بھارت کا گریبان پکڑیں گی۔
فوجیوں کی سہولت کے لیے اقدامات
وزیر ریلوے نے بتایا کہ تمام ریلوے اسٹیشنز پر فوجی بھائیوں کی خدمت کے لیے خصوصی ڈیسک قائم کر دیے گئے ہیں۔
مودی سرکار پر کڑی تنقید
حنیف عباسی نے کہا کہ بھارتی عوام کو مودی جیسے پاگل حکمران سے چھٹکارا حاصل کرنا ہوگا۔ انہوں نے کہا کہ ہمارے لیڈر نے 1998 میں بھارت کے پانچ ایٹمی دھماکوں کے مقابلے میں چھ دھماکے کر کے بھارت کو جواب دیا تھا، اور اگر بھارت نے کوئی مہم جوئی کی تو اسے بھاری قیمت چکانی پڑے گی۔
ملکی اتحاد اور جنگ کی تیاری
انہوں نے کہا کہ اگر جنگ مسلط کی گئی تو سندھی، بلوچی، پنجابی، پختون اور گلگت کے عوام متحد ہو کر دشمن کا مقابلہ کریں گے۔ پاکستان کا ایٹمی پروگرام دفاعی مقاصد کے لیے ہے۔
داخلی مخالفت کے لیے سخت پیغام
حنیف عباسی نے کہا کہ جو بھی پاکستان میں اس نازک وقت پر اختلاف کرے گا، اس کے لیے زندگی تنگ کر دی جائے گی کیونکہ ہم نے بے شمار قربانیاں دی ہیں۔
بھارتی جاسوسوں کی گرفتاری
انہوں نے بتایا کہ پاکستان نے کلبھوشن یادیو کے بعد ایک اور بھارتی جاسوس کو گرفتار کیا ہے۔
بلاول بھٹو کو خراج تحسین
حنیف عباسی نے بلاول بھٹو زرداری کو خراج تحسین پیش کیا کہ انہوں نے کہا تھا کہ چاروں صوبے مل کر دشمن کا مقابلہ کریں گے۔
آخر میں
حنیف عباسی نے کہا کہ پاکستان جنگ میں معصوم بچوں اور عورتوں پر حملہ نہیں کرے گا بلکہ صرف دشمن کے خلاف لڑے گا۔
