چینی مہنگی ہونے کی ذمہ دار حکومت ہے:پاکستان شوگر ملز ایسوسی ایشن

 قیمتوں میں اضافہ ایف بی آر پورٹلز کی بندش ‘حکومتی ڈیلرز اور بین الصوبائی ترسیل پر پابندی سے ہوا
چینی کی بین الصوبائی ترسیل پرغیرآئینی  اور غیرقانونی پابندی اٹھائی جائے:ایسوسی ایشن کا اعلامیہ 
لاہور(آ ئی این پی )پاکستان شوگر ملز ایسوسی ایشن نے کہا ہے کہ  چینی کی قیمتوں میں اضافہ ایف بی آر پورٹلز کی بندش اور حکومتی ڈیلرز کی وجہ سے ہوا، دیگروجوہات میں چینی کی بین الصوبائی ترسیل پر پابندیاں شامل ہے۔جاری اعلامیے میں کہا گیا  ہے انڈسٹری عرصے سے یہ کہہ رہی تھی کہ  پورٹلز بندش سے چینی کی سپلائی کم ہو گی، حکومت کو بندش سے قیمتیں بڑھنے کے حوالے سے بھی خبردار کیاگیا، حکومت نے ملوں پر دباو ڈالے رکھا تا کہ غیرضروری درآمدی چینی کو فروخت کیا جائے۔ایسوسی ایشن نے کہا کہ عوام کی اکثریت نے درآمدی چینی کو پسند نہیں کیا، سندھ میں پورٹلز بند رکھے گئے تاکہ پورٹ پر درآمدی چینی کو پہلے فروخت کیا جا سکے، جب سے حکومت یہ پابندیاں لگا رہی تھی تب سے چینی کی سپلائی کم ہونے لگ گئی۔ان اقدامات سے چینی کی قیمتیں بڑھیں جس کی ذمہ دار شوگر انڈسٹری نہ ہے، پنجاب میں ضلعی انتظامیہ نے ملوں کو مجبور کیا کہ حکومتی نامزد کردہ  ڈیلرز چینی فروخت کریں،  جنہوں نے مارکیٹ میں اپنے فائدے کے لیے چینی مہنگی فروخت کی۔بیان میں کہا گیا کہ نئی چینی مارکیٹ میں آنے سے قیمتیں معمول پر آنے کا امکان ہے، حکومت سے مطالبہ ہے کہ چینی کی بین الصوبائی ترسیل پرغیرآئینی و غیرقانونی پابندی اٹھائی جائے۔