بالی ووڈ کے معروف اداکار ابھیشیک بچن نے اپنی اہلیہ اور اداکارہ ایشوریا رائے کی ماں کے طور پر قربانیوں اور ذمہ داریوں کی تعریف کی ہے۔
بھارتی میڈیا کے مطابق ایک حالیہ انٹرویو میں ابھیشیک نے کہا کہ وہ اپنی بیوی کا شکریہ ادا کرتے ہیں کیونکہ وہ ہمیشہ انہیں کام کرنے کے لیے ایک سازگار ماحول فراہم کرتی ہیں۔ انہوں نے یہ بھی کہا کہ ایشوریا کی موجودگی اور ان کی بیٹی آرادھیا کے ساتھ وقت گزارنا گھر میں سکون کا باعث بنتا ہے۔یہ بیان ایسے وقت آیا جب بالی ووڈ کے اس مشہور جوڑے کی طلاق کی افواہیں پھیل چکی تھیں۔ ابھیشیک کے اس بیان نے ان افواہوں کو فوری طور پر رد کر دیا ہے اور جوڑے کے درمیان محبت بھری تعلقات کو مزید مستحکم کیا ہے۔
ابھیشیک نے مزید بتایا کہ ان کے بچپن میں بھی کبھی انہیں اپنے والدین کی عدم موجودگی کا احساس نہیں ہوا، حالانکہ ان کے والد امیتابھ بچن 1970 کی دہائی میں فلم انڈسٹری کے عروج پر تھے اور ان کی والدہ جیا بچن نے ان کی پیدائش کے بعد فلموں سے وقفہ لے لیا تھا۔ابھیشیک اور ایشوریا 2007 میں رشتہ ازدواج میں منسلک ہوئے اور 2011 میں ان کی بیٹی آرادھیا کی پیدائش ہوئی۔ ایشوریا نے بیٹی کی پیدائش کے بعد فلمی دنیا سے چار سال کا وقفہ لیا اور 2015 میں فلم "جذبہ" کے ذریعے واپسی کی۔ اس کے بعد سے وہ متعدد فلموں میں کام کر رہی ہیں۔
دوسری طرف، ابھیشیک بچن اپنی آنے والی فلموں "بی ہیپی"، "ہاؤس فل 5"، اور "کنگ" کی ریلیز کے لیے تیار ہو رہے ہیں۔
