ایل پی جی مافیا نے عوام کی جیبوں سے 60 تا 70 ارب اضافی نکال لئے

عوام 309 روپے  فی کلو گرام والی ایل پی جی 600 روپے سے بھی  زائد قیمت پر خریدتے رہے
لاہور(مانیٹرنگ ڈیسک)ملکی تاریخ کی مہنگی ترین ایل پی جی کی فروخت کے ذریعے ایل پی جی مافیا نے 60 سے 70 ارب روپے مہنگائی میں پسی ہوئی عوام کی جیبوں سے نکال لیے، عوام 309 روپے فی کلو گرام والی ایل پی جی 600 روپے سے بھی  زائد قیمت پر خریدتے رہے۔پاکستان ایل پی جی ڈسٹری بیوٹر ایسوسی ایشن کے اعداد وشمار کے مطابق پاکستان میں روزانہ 60 لاکھ کلو گرام سے بھی زیادہ ایل پی جی فروخت ہوتی ہے، اوگرا نے اس کی ماہ جون کے لیے قیمت 309 روپے فی کلوگرام مقرر کی مگر کہیں بھی اس قیمت پر ایل پی جی دستیاب ہی نہیں، ہر پلانٹ والے ہر کمپنی والے اور ہر دکان دار کا اپنا ہی ریٹ ہے عوام ملکی تاریخ کی مہنگی ترین ایل پی جی خریدنے پر مجبور ہو چکے ہیں۔پاکستان میں ایل پی جی کی کھپت 60 لاکھ کلو گرام سے زیادہ ہے اگر ساٹھ لاکھ کو ہی تین سو روپے سے ضرب دیں تو ایک ارب اسی کروڑ روپے روزانہ اگر ایک ماہ کا حساب لگائیں 54 ارب اسی کروڑ روپے سے زائد رقم بنتی ہے اور یہ رقم عوام کی جیبوں سے نکال رہے ہیں