وزیراعظم پاکستان محمد شہباز شریف آج اپنے دورہ آزاد کشمیر کے دوران بھمبر جائیں گے جہاں وہ وزیراعظم آزاد کشمیر کے ہمراہ بھمبر دانش سکول سائنس اینڈ ٹیکنالوجی سسٹم کا سنگ بنیاد رکھیں گے۔
یہ سکول آزاد کشمیر میں تعلیم کے شعبے میں اہم پیش رفت کا باعث بنے گا، خصوصاً سائنس اور ٹیکنالوجی کے میدان میں جدید تعلیم کی فراہمی کا ایک اہم قدم ہوگا۔اس منصوبے کا مقصد علاقے کے طلباء کو جدید تعلیمی معیار فراہم کرنا ہے تاکہ وہ عالمی سطح پر مقابلہ کر سکیں۔ سکول میں سائنس اور ٹیکنالوجی کے جدید شعبوں پر خصوصی توجہ دی جائے گی، جس سے نوجوانوں کو بہتر تعلیمی مواقع ملیں گے۔
وزیراعظم کے دورہ کے لیے تمام انتظامات کو حتمی شکل دی جا چکی ہے اور اس موقع پر وفاقی سیکرٹری محی الدین وانی، چیف سیکرٹری آزاد کشمیر اور دیگر اہم شخصیات نے تیاریاں مکمل کرنے کے لیے ایک اجلاس کیا۔ اس دورے کو آزاد کشمیر کے تعلیمی اور ترقیاتی منظرنامے میں ایک نیا باب قرار دیا جا رہا ہے، جو اس علاقے کی ترقی میں سنگ میل ثابت ہو گا۔
وزیراعظم شہباز شریف کے اس دورے کے دوران دیگر اہم مسائل پر بھی گفتگو کی جائے گی اور حکومت کی طرف سے آزاد کشمیر کے عوام کے لیے مزید ترقیاتی منصوبوں کا اعلان متوقع ہے۔
