نہم امتحان میں ناکامی پر 2طالبات کی خود کشی

 لاہور میں 17 سالہ مناہل ، عارف والا میں 15سالہ طالبہ خود کشی کرلی، طالبعلم کی حالت نازک
 لاہور ( کرائم رپورٹر)لاہور،عارفوالا میں نہم جماعت کے امتحانات میں ناکامی پر مزید 2طالبات نے خودکشی کرلی۔ رحیم یارخان میں امتحان میں فیل ہونے پر نہر میں کودنے والی طالبہ کو بچالیا گیا۔ فیصل آباد میں حالات کے ستائے نوجوان نے پھندا لے لیا، جبکہ امتحان میں فیل ہونے سے دلبرداشتہ ہوکر تیزاب پینے والے طالبعلم کی حالت نازک ہے۔ تفصیل کے مطابق لاہور کے علاقے گلدشت ٹاوٓ ن چونگی دوگیج میں نویں کے امتحان میں فیل ہونے پر 17 سالہ طالبہ مناہل نے زہریلی گولیاں کھاکر جان دیدی۔عارفوالا کے نواحی گائوں 26/EB میں نویں جماعت کی 15سالہ طالبہ(م) نیبھی امتحان میں ناکامی پر پسٹل سے گولی مارکر زندگی ختم کرلی۔رحیم یار خان کے نواحی علاقہ کوٹ سمابہ میں نویں جماعت کے نتیجے سے مایوس ایک طالبہ نے عباسیہ لنک نہر میں چھلانگ لگا کر خودکشی کی کوشش کی۔ شہریوں نے فوری طور پر اسے نہر سے نکال کر جان بچائی۔ فیصل آباد کے چک 65 ج ب میں نویں جماعت کے طالبعلم بابر علی ولد نعمت علی نے دو پیپرز میں فیل ہونے پر تیزاب پی لیا۔ ڈاکٹر اسکی جان بچانے کیلئے کوشاں ہیں۔فیصل آباد کے ہی تھانہ صدر کے علاقہ 225 رب احمد نگر میں بیروزگار اشفاق احمد آئے روز گھر والوں سے جھگڑے سے دلبرداشتہ ہوکر گلے میں پھندا ڈال کر چھت پر لگے پنکھے سے جھول گیا۔