کینیا کی ایتھلیٹ ایگنس نگیٹچ نے کوپن ہیگن میں ہونے والی ورلڈ ایتھلیٹکس روڈ رننگ چیمپئن شپ کے دوران خواتین کی ہاف میراتھن میں عالمی ریکارڈ قائم کر دیا۔
25 سالہ ایگنس نگیٹچ نے شاندار کارکردگی کا مظاہرہ کرتے ہوئے 21.1 کلومیٹر کا فاصلہ ایک گھنٹہ، 5 منٹ اور 15 سیکنڈ میں مکمل کیا اور سابق عالمی ریکارڈ میں ایک سیکنڈ کی بہتری کرتے ہوئے نیا ریکارڈ اپنے نام کرلیا۔سابق عالمی ریکارڈ بھی کینیا کی ہی ایتھلیٹ پیرس جیپچرچر کے پاس تھا، جنہوں نے 2020 میں ہاف میراتھن ایک گھنٹہ، 5 منٹ اور 16 سیکنڈ میں مکمل کرکے عالمی ریکارڈ قائم کیا تھا۔نگیٹچ نے دوڑ کے آغاز ہی سے اپنی حریفوں پر برتری قائم کرلی تھی اور مسلسل تیز رفتار برقرار رکھتے ہوئے اختتام تک سب سے آگے رہیں۔ ان کی ہم وطن ویرونیکا لولیو نے 50 سیکنڈ کے فرق سے دوسری پوزیشن حاصل کی۔تاہم خواتین کی ہاف میراتھن کا مجموعی عالمی ریکارڈ اب بھی ایتھوپیا کی لیٹسن بیٹ گیدی کے پاس ہے، جنہوں نے 2021 میں 21.1 کلومیٹر کا فاصلہ ایک گھنٹہ، 2 منٹ اور 52 سیکنڈ میں طے کیا تھا۔
ایگنس نگیٹچ کے لیے رواں سال یہ ایک اور نمایاں کامیابی ہے۔ وہ اس سے قبل جنوری میں ورلڈ کراس کنٹری چیمپئن شپ بھی جیت چکی ہیں، جس کے بعد ہاف میراتھن میں عالمی ریکارڈ ان کے شاندار سیزن میں ایک اور اہم کامیابی بن گیا ہے۔نئے عالمی ریکارڈ کے ساتھ نگیٹچ نے ایک بار پھر خواتین کی طویل فاصلے کی دوڑ میں کینیا کی مضبوط موجودگی کو نمایاں کیا ہے۔
