رانا مشہود احمد خان نے ڈیجیٹل یوتھ ہب ایپ کا آفیشل گانا لانچ کر دیا، شہری مختلف خدمات سے فائدہ اٹھا سکیں گے
چیئرمین پرائم منسٹر یوتھ پروگرام رانا مشہود احمد خان نے ایوان اقبال میں ڈیجیٹل یوتھ ہب ایپ کے آفیشل گانے کی رونمائی کی۔ اس موقع پر انہوں نے بتایا کہ وزیراعظم شہباز شریف 24 مارچ کو ڈیجیٹل یوتھ ہب کا افتتاح کریں گے، جس سے نوجوان سکالرشپس، نوکریاں، ٹریننگ پروگرامز، سٹارٹ اپ سپورٹ اور انویسٹمنٹ کی معاونت حاصل کر سکیں گے۔رانا مشہود احمد خان نے کہا کہ ایپ کے ذریعے نوجوان دنیا بھر سے مختلف خدمات، جیسے کہ ڈیجیٹل سکلز اور کاروباری معاونت، حاصل کر سکیں گے۔ اس ایپ کو آرٹیفیشل انٹیلی جنس کے ذریعے چلایا جائے گا، جس میں تمام کیٹیگریز کی نوکریاں اپ ڈیٹ ہوں گی۔اس ایپ سے ماہانہ 2 سے 5 کروڑ ٹریفک کی توقع ہے، اور اس سال 30 ہزار سے زائد انٹرنشپ پروگرامز اور 10 ہزار سے زائد نوکریوں کے مواقع فراہم کیے جائیں گے۔ انہوں نے کہا کہ جب ملک کی معیشت مثبت سمت میں بڑھتی ہے، تو دشمن عناصر اس کی ترقی میں رکاوٹ ڈالنے کی کوشش کرتے ہیں۔
