آسٹریلین اوپن میں ویمنز کے مقابلوں میں عالمی نمبر ایک بیلاروسی کھلاڑی آرینا سبالینکا نے تیسرے راؤنڈ میں جگہ بنالی ہے۔
سبالینکا نے دوسرے راؤنڈ میں چین کی بائی ژوژوان کو مقابلے کے دونوں سیٹ 6-3 اور 6-1 سے شکست دی۔ پہلے سیٹ میں سبالینکا نے ابتدائی طور پر 5-0 کی برتری حاصل کی، لیکن بائی ژوژوان نے تین گیمز جیت کر دباؤ پیدا کیا، جس کی وجہ سے سبالینکا کو پہلے سیٹ کو مکمل کرنے میں تھوڑا وقت لگا۔دوسرے سیٹ میں سبالینکا نے اپنے کھیل کو دوبارہ سنبھالا اور باآسانی جیت حاصل کی۔ میچ کے بعد سبالینکا نے اپنے حریف کی تعریف کی اور کہا کہ بائی ژوژوان نے پہلے سیٹ میں بہت اچھا کھیل پیش کیا اور انہیں دباؤ میں ڈالا، لیکن انہوں نے ہر لمحے پر توجہ مرکوز رکھی اور جیت حاصل کی۔واضح رہے کہ سبالینکا نے 2023 اور 2024 میں آسٹریلین اوپن جیتنے کا اعزاز حاصل کیا ہے اور اب تیسرے راؤنڈ میں اپنی جگہ پکی کر کے ٹائٹل کی دوڑ میں شامل ہیں۔
