وزیر اعلیٰ پنجاب کی زیر قیادت سکلز ڈویلپمنٹ اتھارٹی اور متعلقہ اداروں کی ترقی کے لیے ایک نئی ٹاسک فورس قائم کی جا رہی ہے تاکہ ان اداروں کی کارکردگی میں بہتری لائی جا سکے اور سکلز ڈویلپمنٹ کے شعبے میں مزید ترقی ہو سکے۔
اس ٹاسک فورس میں 8 پروفیشنل ممبرز ہوں گے، جن میں مختلف حکومتی اداروں اور سکلز ڈویلپمنٹ سے متعلق افراد شامل ہیں۔ٹاسک فورس کی چیئرمین شپ رکن پنجاب اسمبلی عدنان افضل چٹھہ کو دی گئی ہے، جبکہ ٹیوٹا کے چیئرمین کو کنوینئر کے طور پر مقرر کیا گیا ہے۔ اس کے علاوہ، ٹاسک فورس میں سروسز کے دیگر اہم ممبران بھی شامل ہوں گے، جن میں سیکرٹری صنعت و تجارت، سیکرٹری اوقاف پنجاب، چیئرمین پنجاب ووکیشنل کونسل، ڈی جی پنجاب سکل ڈویلپمنٹ اتھارٹی اور سی ای او پنجاب سکلز ڈویلپمنٹ فنڈز کمپنی شامل ہیں۔
ٹاسک فورس کے قیام کا مقصد سکلز ڈویلپمنٹ کے شعبے میں مختلف اقدامات کو موثر طریقے سے منظم کرنا ہے تاکہ نہ صرف سکلز کی ترقی کو فروغ دیا جا سکے بلکہ حکومتی سطح پر ان اداروں کی کارکردگی بھی بہتر بنائی جا سکے۔ اس ٹاسک فورس کے لیے ٹیوٹا کو لوجسٹک سپورٹ فراہم کرنے کی ذمہ داری سونپی گئی ہے۔چیف سیکرٹری پنجاب کو ٹاسک فورس کا نوٹیفکیشن جاری کرنے کی ہدایت بھی دی گئی ہے تاکہ یہ اقدام جلد عمل میں لایا جا سکے اور پنجاب کے سکلز ڈویلپمنٹ کے شعبے میں تیز رفتار ترقی ممکن بن سکے۔
