وزیراعلیٰ پنجاب مریم نواز شریف کی زیر صدارت پنجاب ڈویلپمنٹ پروگرام کے حوالے سے ایک اہم اور خصوصی اجلاس منعقد ہوا، جس میں صوبے کے 189 شہروں میں تعمیر و ترقی کے پراجیکٹس کی منظوری دی گئی۔
اجلاس میں بین الاقوامی مالیاتی اداروں کے تعاون سے مختلف ترقیاتی منصوبوں کی پیش رفت اور نئی حکمت عملی پر غور کیا گیا۔
ورلڈ بینک اور ایشیائی ترقیاتی بینک کی شراکت داری
ورلڈ بینک کے تعاون سے PICP (Punjab Intermediate Cities Improvement Project) کے تحت 15 شہروں میں تعمیر و ترقی کی جائے گی۔ایشین ڈویلپمنٹ بینک کے منصوبے DREAM-II کے تحت 4 شہروں کو ترقیاتی منصوبوں میں شامل کیا گیا ہے۔سالانہ ترقیاتی پروگرام (ADP) کے تحت:11 شہروں میں ترقیاتی کام ترجیحی بنیادوں پر مکمل کیے جائیں گے۔جبکہ 16 شہروں میں جاری منصوبوں کو پایہ تکمیل تک پہنچایا جائے گا۔
144 شہروں میں ہمہ جہت ترقیاتی منصوبے
مجموعی طور پر 144 شہر سالانہ ترقیاتی پروگرام کا حصہ بنائے گئے ہیں۔ان شہروں میں سڑکوں، نکاسی آب، پینے کے پانی، کچرے کی صفائی، گرین بیلٹس، اور شہری خوبصورتی سے متعلق منصوبے شامل ہوں گے۔
پراجیکٹ مینجمنٹ یونٹ کا قیام
اجلاس میں پنجاب ڈویلپمنٹ پروگرام کی مؤثر تکمیل کے لیے پراجیکٹ مینجمنٹ یونٹ (PMU) کے قیام پر بھی اتفاق کیا گیا، جو تمام منصوبوں کی نگرانی اور ہم آہنگی کو یقینی بنائے گا۔
وزیراعلیٰ نے متعلقہ محکموں کو باہمی اشتراک، مؤثر رابطہ کاری اور مقررہ مدت میں کام مکمل کرنے کی ہدایت جاری کی۔
شہری خوبصورتی کے لیے یکساں ڈیزائن بائی لاز کی منظوری
مریم نواز نے اجلاس میں یہ بھی ہدایت دی کہ:"صوبہ بھر میں شاپس، سائن بورڈز اور عمارتوں کے لیے یکساں جمالیاتی معیار پر مبنی بائی لاز تیار کیے جائیں تاکہ ہر شہر کی خوبصورتی بہتر ہو۔"
وزیراعلیٰ مریم نواز کا وژن
وزیراعلیٰ پنجاب کا کہنا تھا:"پنجاب ڈویلپمنٹ پروگرام صرف تعمیراتی منصوبہ نہیں، بلکہ ہر شہر کو خوبصورتی، سہولت اور جدید انفراسٹرکچر کے حوالے سے ایک نیا روپ دینا ہمارا مقصد ہے۔ شہری ترقی وہ بنیاد ہے جس پر ایک مضبوط، خوشحال اور مہذب معاشرہ قائم ہوتا ہے۔"
