نیو جرسی: فیفا ورلڈ کپ 2026 کے فائنل میں اسپین کی تاریخی فتح کے بعد جشن کے مناظر اس وقت کشیدگی میں بدل گئے جب آخری سیٹی بجتے ہی اسپین اور ارجنٹائن کے کھلاڑی آپس میں الجھ پڑے۔
چند لمحوں کے لیے میدان کا منظر فٹبال کے مقابلے سے زیادہ ہنگامہ آرائی کا دکھائی دینے لگا، تاہم آفیشلز اور دونوں ٹیموں کے ارکان نے بروقت مداخلت کرتے ہوئے صورتحال کو قابو میں کر لیا۔اسپین نے اضافی وقت میں فیران ٹوریس کے 106ویں منٹ میں کیے گئے فیصلہ کن گول کی بدولت ارجنٹائن کو 1-0 سے شکست دے کر دوسری مرتبہ فیفا ورلڈ کپ کا ٹائٹل اپنے نام کیا۔ لیکن میچ ختم ہوتے ہی شکست کے غم اور جذباتی ماحول نے کشیدگی کو جنم دے دیا۔عینی شاہدین کے مطابق ارجنٹائن کے مڈفیلڈر لیاندرو پاریڈیس اور اسپین کے دفاعی کھلاڑی ایرک گارشیا کے درمیان پہلے تلخ جملوں کا تبادلہ ہوا، جس کے بعد پاریڈیس غصے میں گارشیا کی طرف بڑھے اور انہیں دھکا دیا، جس سے اسپینش کھلاڑی زمین پر گر گئے۔واقعے کے فوراً بعد دونوں ٹیموں کے دیگر کھلاڑی، متبادل کھلاڑی اور کوچنگ اسٹاف بھی میدان میں آ گئے، جس کے نتیجے میں چند لمحوں کے لیے شدید دھکم پیل اور ہنگامہ آرائی دیکھنے میں آئی۔ تاہم میچ آفیشلز اور ٹیم انتظامیہ کی بروقت مداخلت سے صورتحال مزید خراب ہونے سے بچ گئی اور کھلاڑیوں کو ایک دوسرے سے الگ کر دیا گیا۔
فائنل کے دوران بھی مقابلہ انتہائی سخت اور اعصاب شکن رہا۔ ارجنٹائن کے مڈفیلڈر اینزو فرنانڈیز کو مقررہ وقت کے اختتامی لمحات میں سخت فاؤل کرنے پر ریڈ کارڈ دکھایا گیا، جس کے بعد ارجنٹائن نے میچ کا آخری حصہ صرف دس کھلاڑیوں کے ساتھ کھیلا۔ اس کے علاوہ ارجنٹائن کے کئی کھلاڑیوں کو یلو کارڈز بھی دکھائے گئے، جو میچ کی سختی اور دونوں ٹیموں کے درمیان بھرپور مقابلے کی عکاسی کرتے ہیں۔ہنگامے کے باوجود میچ کے اختتام پر کھیل کا مثبت اور خوبصورت پہلو بھی سامنے آیا۔ اسپین کے متعدد کھلاڑی ارجنٹائن کے کپتان لیونل میسی کے پاس گئے، ان سے مصافحہ کیا اور ان کی حوصلہ افزائی کی۔ اسی طرح دونوں ٹیموں کے ہیڈ کوچز لیونل اسکالونی اور لوئس ڈی لا فوئنٹے نے میدان کے وسط میں ایک دوسرے کو گلے لگا کر بہترین اسپورٹس مین شپ کا مظاہرہ کیا۔
میچ کے بعد ارجنٹائن کے کوچ لیونل اسکالونی نے شکست کو خندہ پیشانی سے قبول کرتے ہوئے کہا، "فتح میں عاجزی ضروری ہے اور شکست میں بھی وقار ہونا چاہیے۔ ہم نے اپنی پوری کوشش کی، اب اس شکست سے سبق سیکھ کر مزید مضبوط انداز میں واپس آئیں گے۔"فیفا ورلڈ کپ 2026 کا یہ فائنل جہاں اسپین کی تاریخی فتح، مضبوط دفاع اور دوسری عالمی ٹرافی کے باعث ہمیشہ یاد رکھا جائے گا، وہیں آخری سیٹی کے بعد پیش آنے والی کشیدگی اور میدان میں ہونے والی ہنگامہ آرائی بھی شائقین کے لیے طویل عرصے تک موضوعِ گفتگو بنی رہے گی۔
