سات مرتبہ کے ومبلڈن چیمپئن نوواک جوکووچ اس سال ومبلڈن 2025 کے فائنل تک رسائی حاصل نہ کر سکے۔
سربین لیجنڈ کو اٹلی کے نوجوان اسٹار جینک سِنر نے سیمی فائنل میں حیران کن شکست سے دوچار کر دیا۔جمعہ کے روز لندن کے آل انگلینڈ کلب میں کھیلے گئے دوسرے سیمی فائنل میں عالمی نمبر ایک جینک سِنر نے اسٹریٹ سیٹس میں 3-6، 3-6، 4-6 سے کامیابی حاصل کی۔ اس جیت کے ساتھ، سِنر نے نہ صرف پہلی بار ومبلڈن کے فائنل میں جگہ بنائی بلکہ وہ ومبلڈن کے فائنل تک پہنچنے والے اٹلی کے پہلے کھلاڑی بھی بن گئے۔
الکاریز کی بھی شاندار پیش قدمی
اس سے قبل کھیلے گئے پہلے سیمی فائنل میں دفاعی چیمپئن کارلوس الکاریز نے امریکی اسٹار ٹیلر فِرٹز کو سخت اور سنسنی خیز مقابلے کے بعد شکست دی۔ الکاریز نے پانچ سیٹس پر مشتمل مقابلے میں 6-3، 4-6، 7-5، 3-6، 6-3 سے کامیابی حاصل کی۔
فائنل اتوار کو: نئی تاریخ رقم ہونے کو تیار
ومبلڈن 2025 کا فائنل اب اتوار کے روز عالمی نمبر ایک جینک سِنر اور اسپین کے کارلوس الکاریز کے درمیان کھیلا جائے گا۔ دونوں نوجوان کھلاڑی پہلی بار ومبلڈن کے گرینڈ سلم فائنل میں ایک دوسرے کے آمنے سامنے ہوں گے۔ یہ مقابلہ نہ صرف شائقین ٹینس کے لیے ایک بڑا معرکہ ہوگا بلکہ ایک نئی تاریخ رقم کرنے کا لمحہ بھی ثابت ہوگا۔
جوکووچ کا خواب چکنا چور
37 سالہ نوواک جوکووچ ومبلڈن میں اپنا آٹھواں ٹائٹل جیتنے کے خواہشمند تھے تاکہ وہ راجر فیڈرر کے برابر آ سکیں، تاہم جینک سِنر کی غیر معمولی کارکردگی نے ان کے خواب کو سیمی فائنل میں ہی چکنا چور کر دیا۔
دلچسپ حقیقت:
جینک سِنر اس سے قبل 2023 میں بھی جوکووچ سے ومبلڈن کے سیمی فائنل میں ہار چکے تھے۔اس بار بدلہ لیتے ہوئے انہوں نے ناقابل شکست انداز میں کامیابی حاصل کی۔
