بھارتی شہر مراد آباد میں ایک انتہائی غیر معمولی اور حیران کن طبی واقعہ سامنے آیا ہے، جہاں ایک خاتون نے صرف پانچ دن کے دوران چار بچوں کو جنم دیا، جس نے طبی ماہرین کو بھی حیرت میں ڈال دیا ہے۔
رپورٹ کے مطابق مسلم خاتون آمنہ نے اپنی پہلی ڈیلیوری 9 مئی کو کی، جس میں انہوں نے ایک بچے کو جنم دیا، جبکہ باقی تین بچوں کی پیدائش 14 مئی کو ہوئی۔ اس طرح مجموعی طور پر دو بیٹے اور دو بیٹیاں پیدا ہوئیں۔اس غیر معمولی کیس میں حیران کن بات یہ ہے کہ چاروں بچوں کی پیدائش نارمل ڈیلیوری کے ذریعے ہوئی، جبکہ عام طور پر اس نوعیت کے پیچیدہ کیسز میں سی سیکشن کو ترجیح دی جاتی ہے۔اسپتال انتظامیہ کے مطابق خاتون کا حمل ابتدا ہی سے ہائی رسک قرار دیا گیا تھا اور انہیں مسلسل طبی نگرانی میں رکھا گیا تھا۔ تاہم اس کے باوجود ڈیلیوری کا یہ غیر معمولی سلسلہ پانچ دن تک جاری رہا۔
میڈیکل ٹیم کے مطابق ماں اور چاروں نومولود بچوں کی حالت اس وقت نسبتاً مستحکم ہے، تاہم انہیں خصوصی نگہداشت میں رکھا گیا ہے تاکہ کسی بھی قسم کی پیچیدگی سے بچا جا سکے۔اس کیس کی نگرانی کرنے والی ڈاکٹرز کی ٹیم نے اسے اسپتال کی تاریخ کا ایک نایاب واقعہ قرار دیا ہے اور کہا ہے کہ اس نوعیت کی نارمل ڈیلیوری کے ساتھ وقفے وقفے سے چار بچوں کی پیدائش انتہائی کم دیکھی گئی ہے۔واقعے کے بعد یہ خبر سوشل میڈیا پر بھی تیزی سے وائرل ہوگئی ہے، جہاں صارفین نے اسے حیرت انگیز اور غیر معمولی طبی واقعہ قرار دیتے ہوئے مختلف تبصرے کیے ہیں۔
