بشریٰ انصاری نے اپنے نئے ویلاگ میں رمضان ٹرانسمیشنز کے حوالے سے اپنے خیالات کا اظہار کیا اور کہا کہ اس جدید دور میں رمضان کی روح کو نظرانداز کیا جا رہا ہے۔
ان کا کہنا تھا کہ رمضان ٹرانسمیشنز کی وجہ سے لوگوں نے عبادات اور روحانی محافل کی جگہ ان شوز کو ترجیح دینا شروع کر دی ہے، جس کی وجہ سے لوگ زیادہ تر وقت ٹرینڈز اور تفریحی مواد دیکھنے میں گزارنے لگے ہیں۔انہوں نے کہا کہ پہلے رمضان میں روزہ رکھ کر لوگ عبادات میں مصروف رہتے تھے، قرآن پڑھتے تھے، اور تسبیحات میں مشغول رہتے تھے، لیکن اب رمضان ٹرانسمیشن دیکھ کر روزہ گزارنا ایک عام سی بات بن چکی ہے۔ بشریٰ انصاری کا کہنا تھا کہ رمضان ٹرانسمیشنز نے عبادت کی اہمیت کو کم کیا ہے، جس کی وجہ سے لوگ اپنے روزے کو فاقہ میں تبدیل کر کے گزارنے لگے ہیں۔
ان کے مطابق، پہلے رمضان میں میڈیا پر اتنی زیادہ ٹرانسمیشنز نہیں ہوتی تھیں، لیکن آج کل یہ ایک بہت بڑا ٹرینڈ بن چکا ہے جس کے نتیجے میں لوگ عبادات کے بجائے تفریحی پروگرامز میں دلچسپی رکھتے ہیں۔ بشریٰ انصاری نے یہ بھی کہا کہ اگرچہ وہ خود بھی بعض اوقات رمضان ٹرانسمیشنز میں شریک ہوتی ہیں تاکہ لوگوں کو خوشی اور تفریح فراہم کی جا سکے، لیکن انہیں اس بات کا دکھ ہے کہ اس کے نتیجے میں عبادات کی اہمیت کم ہو رہی ہے۔اس بیان میں انہوں نے رمضان کی اصل روح کو سمجھنے اور اسے اپنی زندگی میں زیادہ اہمیت دینے کی ضرورت پر زور دیا۔
