اسلام آباد: وزیراعظم شہباز شریف کی جانب سے آج پیٹرولیم مصنوعات کی قیمتوں میں کمی کا اعلان کیے جانے کا امکان ظاہر کیا جا رہا ہے، جس سے عوام کو مہنگائی کے دباؤ میں کچھ ریلیف ملنے کی امید پیدا ہوگئی ہے۔
ذرائع کے مطابق حالیہ دنوں میں ایران اور امریکا کے درمیان جنگ بندی اور کشیدگی میں کمی کے بعد عالمی منڈی میں خام تیل کی قیمتوں میں واضح کمی ریکارڈ کی گئی ہے۔ اس کمی کے اثرات عالمی سطح کے ساتھ ساتھ پاکستان کی درآمدی لاگت پر بھی پڑے ہیں، جس کے باعث حکومت کے لیے قیمتوں میں کمی کا موقع پیدا ہوا ہے۔سرکاری حکام کے مطابق وزیراعظم نے متعلقہ وزارتوں کو ہدایت دی ہے کہ عالمی منڈی میں ہونے والی کمی کا مکمل فائدہ براہ راست عوام تک منتقل کیا جائے۔ اس مقصد کے لیے پیٹرولیم مصنوعات کی قیمتوں کے تعین کے نظام کو مزید شفاف بنانے پر بھی کام جاری ہے۔وزیر پیٹرولیم علی پرویز ملک نے حالیہ بیان میں کہا تھا کہ حکومت ایک نیا ہفتہ وار قیمتوں کا فارمولا تیار کر رہی ہے، جس کے تحت پیٹرول اور ڈیزل کی قیمتوں میں تبدیلی کی وجوہات عوام کے سامنے واضح انداز میں پیش کی جائیں گی۔
ان کے مطابق اس مقصد کے لیے ایک اعلیٰ سطحی کمیٹی بھی تشکیل دے دی گئی ہے جو تمام اسٹیک ہولڈرز سے مشاورت کر رہی ہے۔ذرائع کا کہنا ہے کہ حکومت کی جانب سے ممکنہ طور پر پیٹرول اور ڈیزل کی قیمتوں میں نمایاں کمی کا اعلان کیا جا سکتا ہے، تاہم حتمی فیصلہ عالمی قیمتوں، ڈالر ریٹ اور درآمدی اخراجات کو مدنظر رکھتے ہوئے کیا جائے گا۔دوسری جانب توانائی کے ماہرین کا کہنا ہے کہ اگر عالمی منڈی میں خام تیل کی موجودہ کمی برقرار رہتی ہے تو پاکستان میں بھی آئندہ قیمتوں کے اعلان میں عوام کو قابل ذکر ریلیف مل سکتا ہے۔حکومتی اعلان متوقع ہے کہ آج یا آئندہ چند گھنٹوں میں پیٹرولیم مصنوعات کی نئی قیمتوں کا باضابطہ اعلان کر دیا جائے گا۔
