وینزویلا میں آنے والے شدید زلزلوں کے بعد تباہی کا سلسلہ جاری ہے، جہاں ہلاکتوں کی تعداد 5 ہزار سے تجاوز کر گئی ہے جبکہ ہزاروں افراد زخمی اور بے گھر ہو چکے ہیں۔
حکام کے مطابق زلزلوں کے نتیجے میں اب تک 5 ہزار سے زائد افراد جان کی بازی ہار چکے ہیں جبکہ زخمیوں کی تعداد 16 ہزار 740 تک پہنچ گئی ہے۔ حکام کا کہنا ہے کہ زخمیوں میں سے بیشتر افراد کو طبی امداد کے بعد اسپتالوں سے فارغ کر دیا گیا ہے، تاہم کچھ زخمی اب بھی زیرِ علاج ہیں۔غیر ملکی میڈیا رپورٹس کے مطابق زلزلوں سے متاثرہ علاقوں میں تقریباً 20 ہزار افراد بے گھر ہو چکے ہیں، جنہیں عارضی خیمہ بستیوں اور امدادی کیمپوں میں منتقل کیا گیا ہے۔ تاہم ان کیمپوں میں بنیادی سہولتوں کی کمی ایک بڑا مسئلہ بن گئی ہے۔رپورٹس کے مطابق کئی کیمپوں میں صاف پانی کی فراہمی، نکاسی آب اور صفائی کے مناسب انتظامات موجود نہیں، جس کے باعث متاثرین کو مزید مشکلات کا سامنا ہے۔ امدادی ادارے متاثرہ علاقوں میں خوراک، طبی سہولیات اور دیگر ضروری اشیا پہنچانے میں مصروف ہیں۔واضح رہے کہ 24 جون کو وینزویلا میں 7.2 اور 7.5 شدت کے دو طاقتور زلزلے آئے تھے جنہوں نے کئی علاقوں میں بڑے پیمانے پر تباہی مچائی۔ زلزلوں کے بعد عمارتوں کے منہدم ہونے، سڑکوں کو نقصان پہنچنے اور مواصلاتی نظام متاثر ہونے کی اطلاعات سامنے آئی تھیں۔حکام کے مطابق ریسکیو اور بحالی کا کام تاحال جاری ہے جبکہ متاثرہ علاقوں میں مزید نقصانات کا جائزہ لیا جا رہا ہے۔
