مال روڈ چیئرنگ کراس پر جماعت اسلامی کا دھرنا تیسرے روز بھی جاری ہے، جس میں جماعت کے کارکنوں، شہریوں اور عوام کی بڑی تعداد شریک ہے۔
اس دوران امیر جماعت اسلامی پاکستان حافظ نعیم الرحمن نے پریس کانفرنس سے خطاب کرتے ہوئے حکومت پر زور دیا کہ وہ پٹرول اور ڈیزل کی قیمتیں فوری طور پر کم کرے اور لیوی ٹیکس کو ختم کرے تاکہ عوام کو ریلیف مل سکے۔ انہوں نے بتایا کہ گزشتہ رات بھی حکومت نے پٹرول اور ڈیزل کی قیمتوں میں اضافہ کیا ہے، جس سے عوام کی مشکلات میں اضافہ ہوا ہے۔ حافظ نعیم الرحمن کا کہنا تھا کہ یہ دھرنا اب صرف احتجاجی مظاہرہ نہیں بلکہ ایک تحریک بن چکی ہے اور یہ ہڑتال کی صورت اختیار کرے گا۔ انہوں نے مزید کہا کہ وہ کل پشاور جائیں گے اور اس کے بعد کراچی کا دورہ کریں گے، جہاں عوامی مطالبات کے حق میں ہڑتال کا اعلان کریں گے۔
امیر جماعت اسلامی نے حکومت سے مطالبہ کیا کہ وہ فوری طور پر لیوی ٹیکس ختم کرے کیونکہ یہ عوام پر اضافی بوجھ ہے۔ انہوں نے واضح کیا کہ جماعت اسلامی کا مقصد ذاتی مفادات نہیں بلکہ عوام کی فلاح و بہبود ہے۔ اس دوران دھرنے کے شرکاء کا کہنا ہے کہ وہ حکومت کی نااہلی اور مہنگائی کے خلاف اپنی جدوجہد جاری رکھیں گے اور مطالبات منوانے تک یہ تحریک جاری رہے گی۔
