جمعیت علمائے اسلام (جے یو آئی) کے سربراہ مولانا فضل الرحمن نے اسپین جانے والی کشتی کے حادثے پر گہری تشویش کا اظہار کیا ہے اور کہا ہے کہ اس قسم کے حادثات میں اضافے کی وجہ نوجوانوں کا ملک میں روزگار کے مواقع کی کمی ہے۔
انہوں نے کہا کہ نوجوان اپنے ملک میں روزگار نہ ملنے پر ایسی بھیانک اور جان لیوا مسافرتوں کا انتخاب کرتے ہیں جو کہ افسوسناک ہے۔ مولانا فضل الرحمن نے مزید کہا کہ انسانی اسمگلنگ کے خطرات کا خاتمہ ہونا چاہیے اور ان عناصر کا سخت احتساب کیا جانا چاہیے جو ایسے غیر قانونی سفر کا سامان فراہم کرتے ہیں۔جے یو آئی کے سربراہ نے ریاست کی ذمہ داری پر زور دیا کہ وہ عوام کے لیے روزگار کے مواقع فراہم کرے تاکہ عوام کو اس طرح کے خطرناک فیصلوں کا سامنا نہ ہو۔ انہوں نے اس حادثے میں جاں بحق ہونے والے پاکستانیوں کے لواحقین سے اظہار تعزیت کرتے ہوئے دعا کی کہ اللہ کریم ان کی مغفرت فرمائے اور متاثرہ خاندانوں کو صبر جمیل دے۔مولانا فضل الرحمن نے یہ بھی کہا کہ متاثرہ خاندانوں کو اس سانحے میں اپنے پیاروں کی لاشوں کی وطن واپسی اور صحیح معلومات فراہم کی جانی چاہیئیں تاکہ ان کے دکھ میں کمی آ سکے۔
