وزیرِ اعظم شہباز شریف نے کہا ہے کہ حکومت معیشت کو بہتر بنانے کے لیے دن رات محنت کر رہی ہے، تاہم اس کے باوجود ابھی مزید محنت کی ضرورت ہے تاکہ عوام کو حقیقی طور پر فائدہ پہنچ سکے۔
انہوں نے کہا کہ آہستہ آہستہ عوام کو بہتر معیشت کے ثمرات ملنا شروع ہو گئے ہیں، اور حکومت نے مختلف اصلاحات اور اقدامات کیے ہیں تاکہ ملک کی معیشت کو مستحکم کیا جا سکے۔وزیرِ اعظم نے اپنے پیغام میں کہا کہ جب حکومت سنبھالی تو ملک کی اقتصادی حالت انتہائی مشکل تھی، اور مختلف سیاسی تنازعات اور جھگڑوں کی وجہ سے ملک میں نفرت اور انتشار پھیل رہا تھا۔ ان کا کہنا تھا کہ پی ٹی آئی کے دور میں نفرت کا کلچر بڑھا جس نے ملکی حالات کو مزید پیچیدہ بنایا، لیکن اب حکومت نے اس کلچر کے خاتمے کی کوشش کی ہے۔شہباز شریف نے کہا کہ باہمی اتفاق و اتحاد سے ہی ملک کی ترقی اور معیشت کی بہتری ممکن ہے، اور یہی راستہ ملک کو آگے لے جانے کا واحد حل ہے۔ انہوں نے مزید کہا کہ ان کی حکومت نے سفارشی کلچر کے خاتمے کے لیے اقدامات کیے ہیں تاکہ شفافیت اور میرٹ کی بنیاد پر فیصلہ سازی ہو۔وزیرِ اعظم نے مہنگائی کے بارے میں بھی بات کرتے ہوئے کہا کہ حکومت کی کوششوں کے باعث مہنگائی کی شرح سنگل ڈیجٹ پر آ چکی ہے اور آئندہ ماہوں میں مہنگائی کا گراف مزید نیچے آئے گا۔
انہوں نے کہا کہ بینکوں کا مارک اپ ریٹ بہتر ہو چکا ہے جس سے معیشت کو استحکام ملے گا۔وزیرِ اعظم نے یہ بھی کہا کہ مہنگائی میں کمی کے لیے پوری حکومت کی ٹیم اور سرکاری افسران کی محنت کا بڑا حصہ ہے اور انہیں اپنی محنت جاری رکھنے کی ضرورت ہے تاکہ معیشت کو مزید مستحکم کیا جا سکے۔شہباز شریف نے اس بات پر زور دیا کہ ملک کی ترقی اور استحکام کے لیے تمام اسٹیک ہولڈرز کو خلوص نیت سے کام کرنا ہوگا، اور انہوں نے خصوصاً فوج کی قربانیوں کو سراہا، جو ملکی سلامتی کے لیے اپنی جانیں قربان کر رہی ہے۔ان کا کہنا تھا کہ جب تک ہم سب متحد ہو کر محنت کریں گے، ملک کا مستقبل روشن ہوگا اور تمام چیلنجز پر قابو پایا جا سکے گا۔
