پشاور کے علاقے گلبہار میں جی ٹی روڈ پر ایک پولیس اہلکار نے مبینہ طور پر کپڑا اسمگل کرنے والے چنگچی رکشہ کو روکنے کی کوشش میں چلتی گاڑی کو پکڑ لیا۔
وائرل ویڈیو میں دیکھا جا سکتا ہے کہ اہلکار نے گاڑی کے آگے آ کر اسے روکنے کی کوشش کی، لیکن ڈرائیور نے رکنے کے بجائے گاڑی کی رفتار جاری رکھی، جس سے اہلکار چنگچی کے ساتھ چمٹ گیا اور کچھ فاصلے تک گھسٹتا رہا۔راہگیروں نے اس منظر کو حیرت اور خوف کے ساتھ دیکھا جبکہ ویڈیو چند ہی گھنٹوں میں سوشل میڈیا پر تیزی سے پھیل گئی۔
محکمہ پولیس کی کارروائی:
ویڈیو وائرل ہونے کے بعد ایس ایس پی آپریشنز پشاور نے فوری نوٹس لیتے ہوئے اہلکار کو معطل کر دیا۔پولیس ترجمان کے مطابق اہلکار نے بغیر کسی بیک اپ یا حفاظتی منصوبے کے خطرناک اقدام کیا، جو نہ صرف اس کی جان کو خطرے میں ڈالنے کے مترادف تھا بلکہ محکمانہ قواعد کی خلاف ورزی بھی ہے۔اس واقعے پر داخلی انکوائری شروع کر دی گئی ہے۔
سوشل میڈیا ردعمل:
کچھ صارفین نے اہلکار کو بہادر قرار دیتے ہوئے کہا:“کم از کم اس نے کوشش تو کی، بہت سے لوگ تو خاموش رہ جاتے ہیں۔”جبکہ دیگر نے اس اقدام کو غیر پیشہ ورانہ اور غیر ذمہ دارانہ قرار دیتے ہوئے تبصرہ کیا:“ہیرو بننے کا شوق مہنگا پڑ گیا، طریقہ کار غلط تھا۔”
