بھارت کی ریاست منی پور میں مسیحی رہنماؤں اور ایک مذہبی تنظیم کے صدر سمیت تین مذہبی پیشواؤں کے قتل کے واقعے کے بعد صورتحال شدید کشیدہ ہو گئی ہے۔
مقامی رپورٹس کے مطابق تھڈو بیپٹسٹ ایسوسی ایشن سے وابستہ مذہبی رہنماؤں پر اُس وقت حملہ کیا گیا جب وہ ایک مذہبی کانفرنس سے واپس جا رہے تھے۔ حملے میں متعدد افراد زخمی بھی ہوئے جن میں بعض پادریوں کی حالت تشویشناک بتائی جا رہی ہے۔واقعے کے بعد کُکی تنظیموں کی جانب سے شدید احتجاج کیا گیا ہے۔ مختلف علاقوں میں شاہراہیں بند کرنے اور مظاہروں کا اعلان کیا گیا ہے، جبکہ مقامی سطح پر کشیدگی میں اضافہ ہو گیا ہے۔مظاہرین اور مقامی تنظیموں کا مؤقف ہے کہ مذہبی اقلیتوں اور رہنماؤں کو نشانہ بنایا جا رہا ہے جبکہ ریاستی سطح پر مؤثر تحفظ فراہم کرنے میں ناکامی سامنے آ رہی ہے۔
اس صورتحال نے سکیورٹی اداروں اور انتظامی کارکردگی پر بھی سوالات کھڑے کر دیے ہیں۔دوسری جانب حکام کی جانب سے واقعے کی تحقیقات کا آغاز کر دیا گیا ہے اور علاقے میں سکیورٹی مزید سخت کر دی گئی ہے تاکہ حالات کو قابو میں رکھا جا سکے۔تجزیہ کاروں کے مطابق منی پور میں حالیہ واقعات نے پہلے سے جاری کشیدگی کو مزید بڑھا دیا ہے، جس کے باعث خطے میں امن و امان کی صورتحال تشویشناک حد تک بگڑ گئی ہے۔
