خون عطیہ کرنے والے افراد انسانیت کے حقیقی ہیروز ہیں،گورنر سندھ

 محفوظ انتقالِ خون صحت مند اور ذمہ دار معاشرے کے قیام کیلئے ناگزیر ہے،نہال ہاشمی
کراچی(آئی این پی )گورنر سندھ سید محمد نہال ہاشمی نے کہا ہے کہ خون عطیہ کرنے والے افراد انسانیت کے حقیقی ہیروز ہیں۔عالمی یومِ عطیہ خون پر اپنے پیغام میں گورنر سندھ سید محمد نہال ہاشمی کا کہنا تھا کہ عطیہ خون انسانیت کی خدمت اور کسی زندگی کو بچانے کا عظیم عمل ہے، خون کا ایک عطیہ کسی ضرورت مند کیلئے نئی امید اور نئی زندگی بن سکتا ہے۔انہوں نے عوام بالخصوص نوجوانوں سے رضاکارانہ طور پر خون عطیہ کرنے کی اپیل کی ہے۔ان کا کہنا تھا کہ محفوظ انتقالِ خون صحت مند اور ذمہ دار معاشرے کے قیام کیلئے ناگزیر ہے، تھیلیسیمیا، ہیموفیلیا اور دیگر مریضوں کیلئے مسلسل عطیاتِ خون وقت کی اہم ضرورت ہیں۔سید محمد نہال ہاشمی نے کہا کہ خون عطیہ کرنے والے افراد انسانیت کے حقیقی ہیروز ہیں، صحت مند شہری عطیہ خون کو اپنی سماجی ذمہ داری اور انسانی خدمت کا حصہ بنائیں۔