نائب امیر جماعت اسلامی پاکستان لیاقت بلوچ کا حکومت سے مطالبہ: عوام کو ریلیف فراہم کیا جائے
جماعت اسلامی پاکستان کے نائب امیر لیاقت بلوچ نے حکومت سے مطالبہ کیا ہے کہ آئندہ بجٹ میں عوام کو ریلیف فراہم کیا جائے اور سرکاری ملازمین کی تنخواہوں میں ٹیکس کٹوتی میں خاطر خواہ کمی کی جائے۔ اپنے ایک بیان میں لیاقت بلوچ نے کہا کہ سرکاری ملازمین کی تنخواہوں پر عائد ٹیکس کی شرح میں کمی کرنے سے انہیں مالی مشکلات سے نجات ملے گی اور ان کی زندگی میں بہتری آئے گی۔انہوں نے تحریک آزادی کشمیر کے حوالے سے بات کرتے ہوئے کہا کہ بھارت کا یہ دعویٰ کہ کشمیر کی تحریک آزادی دہشت گردی ہے، یو این چارٹر کے خلاف ہے۔ لیاقت بلوچ نے کہا کہ بھارت کے انتخابی مفادات کے لیے پہلگام کا جھوٹ اور جنگی حکمت عملی ناکام ہو چکی ہے، اور اس کا مقصد کشمیر کی آزادی کی تحریک کو دبا کر اپنی انتخابی جیت کو یقینی بنانا تھا۔
انہوں نے مزید کہا کہ پاک بھارت جنگی معرکے میں امریکا اور مغربی ممالک کے اسلحہ کی برتری قائم نہیں رہی، اور یہ بات واضح ہو گئی ہے کہ سیاسی، اقتصادی اور قومی سلامتی کے بحرانوں کے درمیان قومی کانفرنس کی ضرورت ہے۔ ان کا کہنا تھا کہ پاکستان کے داخلی اور خارجی مسائل کو حل کرنے کے لیے سیاسی جماعتوں اور حکومت کو ایک مشترکہ فورم پر آنا ہوگا، تاکہ قومی مسائل پر متفقہ پالیسی تشکیل دی جا سکے۔
