رمضان کے دوران مہنگائی میں مسلسل اضافہ، چینی اور دیگر اشیا کی قیمتوں میں ریکارڈ اضافہ
اسلام آباد: رمضان المبارک کے دوسرے ہفتے میں مہنگائی کی شرح میں مزید اضافہ ریکارڈ کیا گیا ہے، جس کے مطابق ایک ہفتے میں مہنگائی کی شرح 0.22 فیصد تک بڑھ گئی ہے۔ وفاقی ادارہ شماریات کے مطابق رمضان میں اشیائے ضروریہ کی قیمتوں میں اضافے کا سلسلہ جاری ہے۔رپورٹ کے مطابق، چینی کی قیمت مسلسل پندرہویں ہفتے میں مزید بڑھ گئی ہے اور ایک ہفتے میں 9 روپے 26 پیسے فی کلو تک مہنگی ہو گئی ہے۔ اس کے علاوہ، ٹماٹر، برائلر مرغی، کیلے، بیف، اور ایل پی جی گھریلو سلنڈر کی قیمتوں میں بھی اضافے کا سامنا ہے۔اعداد و شمار کے مطابق، ٹماٹر کی قیمت 21 روپے 37 پیسے فی کلو، برائلر مرغی 30 روپے 64 پیسے فی کلو مہنگی ہو گئی ہے، جبکہ کیلے کی قیمت 12 روپے 18 پیسے فی درجن اور بیف 6 روپے فی کلو مہنگا ہوا ہے۔
اسی طرح ایل پی جی گھریلو سلنڈر کی قیمت میں بھی 46 روپے 19 پیسے کا اضافہ ہوا ہے۔رپورٹ میں یہ بھی بتایا گیا کہ اس ہفتے 15 اشیاء سستی ہوئی ہیں، جن میں پیاز، آلو، لہسن، دال چنا اور دال ماش شامل ہیں۔ پیاز کی قیمت میں 13 روپے 97 پیسے کمی، آلو 5 روپے 16 پیسے فی کلو، اور لہسن 35 روپے 63 پیسے فی کلو سستا ہوا۔ اس کے علاوہ، دال چنا اور دال ماش کی قیمتوں میں بھی کمی آئی ہے۔اس کے علاوہ، انڈے، دال مسور، چاول، خوردنی تیل اور گھی بھی سستی ہونے والی اشیاء میں شامل ہیں۔
