اسلام آباد: عالمی مارکیٹ میں پیٹرولیم مصنوعات کی قیمتوں میں اضافے کے بعد پاکستان میں 15 جون سے پیٹرول اور ڈیزل کی قیمتوں میں بالترتیب تقریباً ایک روپے اور 5 روپے فی لیٹر اضافے کا امکان ظاہر کیا جا رہا ہے۔
پیٹرول ایک روپے، ڈیزل 5 روپے مہنگا ہونے کا تخمینہ
ذرائع کے مطابق، موجودہ ٹیکس شرحوں کو مدنظر رکھتے ہوئے 15 جون کو پیٹرول کی ایکس ڈپو قیمت میں ایک روپے فی لیٹر اور ہائی اسپیڈ ڈیزل (ایچ ایس ڈی) کی قیمت میں 5 روپے فی لیٹر اضافے کی توقع ہے۔
پیٹرول کی موجودہ ایکس ڈپو قیمت 252.63 روپے فی لیٹر ہے۔
ڈیزل کی موجودہ ایکس ڈپو قیمت 254.64 روپے فی لیٹر ہے۔
عوام پر براہ راست اثر
پیٹرول زیادہ تر نجی ٹرانسپورٹ، موٹر سائیکلوں، رکشوں اور چھوٹی گاڑیوں میں استعمال ہوتا ہے، اس لیے اس کی قیمت میں اضافے کا براہ راست اثر متوسط اور نچلے طبقے کے روزمرہ بجٹ پر پڑے گا۔دوسری جانب، ہائی اسپیڈ ڈیزل زیادہ تر بھاری گاڑیوں، زرعی مشینری، ٹرینوں اور ٹرکوں میں استعمال ہوتا ہے، جو اشیائے خورونوش اور اجناس کی ترسیل کا ذریعہ ہیں۔ ڈیزل کی قیمتوں میں اضافہ مہنگائی بڑھنے کی بڑی وجہ بنتا ہے، تاہم قیمتوں میں کمی کے باوجود ٹرانسپورٹ کرایوں میں نرمی شاذ و نادر ہی دیکھنے میں آتی ہے۔
ٹیکسز اور لیویز کا بوجھ
اس وقت پیٹرول اور ڈیزل پر تقریباً 94 روپے فی لیٹر مختلف ٹیکسز اور چارجز عائد ہیں:
پیٹرولیم لیوی: ڈیزل پر 77.01 روپے، پیٹرول اور ہائی آکٹین پر 78.02 روپے فی لیٹر۔
کسٹم ڈیوٹی: تقریباً 16 روپے فی لیٹر، چاہے مصنوعات درآمدی ہوں یا مقامی۔
ڈسٹری بیوشن اور ڈیلرز مارجن: تقریباً 17 روپے فی لیٹر۔
قابل ذکر بات یہ ہے کہ تمام پیٹرولیم مصنوعات پر جی ایس ٹی فی الوقت صفر ہے، لیکن دیگر محصولات کے ذریعے حکومت عوام سے خطیر رقم وصول کر رہی ہے۔
