یومِ آزادی کے موقع پر ملک بھر میں سیاسی و حکومتی رہنماؤں نے قوم کو مبارکباد دی ہے اور وطن کے حصول کی جدوجہد میں قربانی دینے والوں کو خراجِ عقیدت پیش کیا ہے۔
صدر مملکت آصف علی زرداری، وزیراعظم شہباز شریف اور وفاقی وزیر داخلہ محسن نقوی نے اپنے پیغامات کے ذریعے ملک کی تاریخ، اتحاد اور ترقی کی اہمیت پر زور دیا ہے۔صدر مملکت آصف علی زرداری نے اپنے پیغام میں کہا کہ پاکستان کا معرکہ حق یہ ثابت کرتا ہے کہ ملک امن کا خواہاں ہے اور اپنی دفاعی صلاحیتوں کے ساتھ خطے میں استحکام کے لیے پرعزم ہے۔ انہوں نے مزید کہا کہ پاکستان خطے میں کشیدگی کے خاتمے اور علاقائی استحکام کے فروغ کے لیے اپنی کوششیں جاری رکھے گا۔
وزیراعظم شہباز شریف نے اپنے پیغام میں کہا کہ قومی ترقی، استحکام اور خوشحالی کا سفر تیزی سے جاری ہے، اور پوری قوم کو مل کر ملک کی تعمیر و ترقی کے عمل میں اپنا کردار ادا کرنا چاہیے تاکہ روشن مستقبل کی جانب سفر جاری رہے۔
وفاقی وزیر داخلہ محسن نقوی نے تحریک پاکستان کے رہنماؤں اور بانی پاکستان قائداعظم محمد علی جناح کا ذکر کرتے ہوئے کہا کہ ان کا احسان قوم تاقیامت نہیں ادا کرسکتی۔ انہوں نے زور دیا کہ وطنِ عزیز کی خاطر ذاتی مفادات سے بالاتر ہوکر یکجا ہونا ہوگا کیونکہ یہ وطن ہم سب پر قرض ہے، جسے فرض سمجھ کر ادا کرنا چاہیے۔یہ مواقع قوم کی وحدت، عزم اور حب الوطنی کا عکاس ہیں، جن میں رہنماؤں نے پاکستان کی ترقی اور سلامتی کے لیے دعا اور عزم کا اظہار کیا۔
