حسن ابدال میں واقع گوردوارہ سری پنجہ صاحب میں آج منعقد ہونے والی بیساکھی میلے کی مرکزی تقریب کی تیاریاں حتمی مراحل میں داخل ہو گئی ہیں۔
اس اہم مذہبی اور ثقافتی تقریب کے انعقاد کے لیے تمام انتظامات کو آخری شکل دی جا رہی ہے۔ صوبائی وزیر برائے اقلیتی امور رمیش سنگھ اروڑہ نے رات گئے گوردوارہ کا دورہ کیا، جہاں انہوں نے سیکیورٹی انتظامات، سیکورٹی کیمروں کی مانیٹرنگ، اور دیگر ضروری اقدامات کا تفصیلی جائزہ لیا۔ اس موقع پر انہوں نے جدید نگرانی نظام اور مربوط کوآرڈینیشن کو سراہتے ہوئے انتظامیہ اور پولیس کی کارکردگی کی تعریف کی۔ انہوں نے کہا کہ گوردوارہ سری پنجہ صاحب مذہبی اور بین الاقوامی سطح پر انتہائی اہمیت کا حامل ہے، اور بیساکھی میلے کے دوران سکھ یاتریوں کو بہترین سہولیات فراہم کرنا حکومت کی اولین ترجیح ہے۔
وزیر اقلیتی امور نے متروکہ وقف املاک بورڈ کی جانب سے یاتریوں کے لیے فراہم کی جانے والی سہولیات پر اطمینان کا اظہار کیا اور اس حوالے سے انتظامیہ کا شکریہ ادا کیا۔ اس موقع پر رمیش سنگھ اروڑہ نے کہا کہ بین المذاہب ہم آہنگی کے فروغ کے لیے پولیس اور ضلعی انتظامیہ کی کوششیں قابلِ ستائش ہیں، اور ایسے اقدامات معاشرتی ہم آہنگی کو مزید مضبوط بناتے ہیں۔ انہوں نے امید ظاہر کی کہ یہ میلہ امن اور محبت کا پیغام لے کر آئے گا، اور یاتریوں کے لیے ایک خوشگوار اور محفوظ تجربہ ثابت ہوگا۔
