نائب وزیراعظم اسحاق ڈار سے چینی سفیر نے ملاقات کی، جس میں اسلام آباد مذاکرات کے بعد کی صورتحال اور خطے کی تازہ پیش رفت پر تبادلۂ خیال کیا گیا۔
ملاقات کے دوران دونوں رہنماؤں نے اس بات پر اتفاق کیا کہ علاقائی امن و استحکام کے لیے سفارت کاری اور مکالمہ انتہائی اہم ہیں۔ اسحاق ڈار نے کہا کہ پاکستان آئندہ بھی مذاکرات اور سفارتی کوششوں کے فروغ کے لیے اپنا کردار ادا کرتا رہے گا۔چینی سفیر نے امریکا اور ایران کے درمیان براہِ راست مذاکرات میں پاکستان کے کردار کو سراہتے ہوئے کہا کہ اسلام آباد کی میزبانی اور سفارتی کوششیں خطے میں کشیدگی کم کرنے میں اہم ثابت ہوئیں۔ دونوں فریقین نے پاکستان اور چین کے درمیان China–Pakistan Economic Corridor اور مجموعی اسٹریٹجک شراکت داری کو مزید مضبوط بنانے کے عزم کا بھی اعادہ کیا۔
دوسری جانب ایک علیحدہ اجلاس میں نائب وزیراعظم نے وزارتِ خارجہ کے افسران کی کارکردگی کو سراہتے ہوئے کہا کہ اسلام آباد مذاکرات کے دوران ان کی محنت اور پیشہ ورانہ مہارت قابلِ تحسین ہے۔ انہوں نے کہا کہ ایران اور امریکا کے درمیان مذاکرات کا انعقاد خطے میں امن اور استحکام کی جانب ایک اہم پیش رفت ہے۔
