بھارت کی اپوزیشن جماعتوں نے مبینہ انتخابی دھاندلی کے خلاف احتجاج کرتے ہوئے چیف الیکشن کمشنر گیانیش کمار کے استعفے کا مطالبہ کرنے کے لیے دہلی میں سپریم کورٹ تک مارچ کرنے کا فیصلہ کیا ہے۔
میڈیا رپورٹس کے مطابق یہ مارچ دارالحکومت میں جاری احتجاجی سرگرمیوں کا حصہ ہے۔ مظاہروں کے پیش نظر دہلی میں سکیورٹی فورسز کی بڑی تعداد تعینات کی گئی ہے، جبکہ مختلف سڑکوں پر رکاوٹیں بھی کھڑی کر دی گئی ہیں۔رپورٹس کے مطابق ہفتے کے آخر میں کاکروچ جنتا پارٹی پریشر گروپ کی جانب سے احتجاج کی کوششوں کے دوران ہزاروں مظاہرین کو حراست میں لیا گیا۔اپوزیشن جماعتوں کا الزام ہے کہ چیف الیکشن کمشنر گیانیش کمار کے دور میں ووٹر فہرستوں میں مبینہ ردوبدل کیا جا رہا ہے تاکہ وزیراعظم نریندر مودی کی جماعت بھارتیہ جنتا پارٹی (بی جے پی) کو فائدہ پہنچایا جا سکے۔ تاہم، بھارتی الیکشن کمیشن اور بی جے پی نے ان الزامات کو مسترد کر دیا ہے۔اپوزیشن قانون ساز چیف جسٹس سوریہ کانت کو اپنے مطالبات پر مشتمل یادداشت پیش کرنا چاہتے تھے، تاہم میڈیا رپورٹس کے مطابق چیف جسٹس نے صحافیوں کو بتایا کہ انہوں نے بعض وجوہات کی بنا پر ملاقات سے انکار کر دیا۔
