نئی دہلی: بھارت میں دہلی سے چنئی جانے والی انڈیگو ایئرلائن کی پرواز 6E6115 میں دورانِ پرواز پاور بینک میں آگ لگنے کے باعث ہنگامی صورتحال پیدا ہوگئی، جس کے بعد پائلٹس نے حفاظتی اقدامات کے تحت طیارے کا رخ حیدرآباد کی جانب موڑ دیا۔
ذرائع کے مطابق ایئربس اے 321 طیارہ تقریباً 35 ہزار فٹ کی بلندی پر پرواز کر رہا تھا کہ اس دوران اوور ہیڈ کمپارٹمنٹ میں رکھے پاور بینک میں اچانک آگ بھڑک اٹھی۔ واقعے کے باعث طیارے میں موجود مسافروں اور عملے کو ممکنہ خطرے کا سامنا کرنا پڑا۔رپورٹ کے مطابق کیبن کریو نے فوری کارروائی کرتے ہوئے آگ بجھانے والے آلے کی مدد سے آگ پر قابو پالیا۔ تاہم صورتحال کی سنگینی کو مدنظر رکھتے ہوئے پائلٹس نے طیارے کو قریبی حیدرآباد ایئرپورٹ پر اتارنے کا فیصلہ کیا تاکہ مسافروں کی حفاظت کو یقینی بنایا جاسکے۔طیارے کو حیدرآباد کے راجیو گاندھی انٹرنیشنل ایئرپورٹ پر بحفاظت اتارنے کے بعد گراؤنڈ کردیا گیا۔ بعد ازاں مسافروں کو متبادل طیارے کے ذریعے ان کی منزل چنئی پہنچایا گیا۔ایوی ایشن ذرائع کے مطابق پاور بینکس میں لیتھیم آئن بیٹریاں استعمال ہوتی ہیں، جو خراب ہونے، شارٹ سرکٹ یا ضرورت سے زیادہ گرم ہونے کی صورت میں آگ پکڑ سکتی ہیں۔
اسی وجہ سے دورانِ سفر ان آلات کو احتیاط سے رکھنے اور ایئرلائنز کی حفاظتی ہدایات پر عمل کرنے کی اہمیت پر زور دیا جاتا ہے۔ماہرین کے مطابق دورانِ پرواز لیتھیم بیٹری میں آگ لگنے کا واقعہ مسافروں کی حفاظت کے لیے سنگین خطرہ بن سکتا ہے، کیونکہ ایسی آگ کے ساتھ دھواں اور دوبارہ آگ بھڑکنے کا خدشہ بھی موجود رہتا ہے۔ اس لیے کیبن کریو کی فوری کارروائی اور پائلٹس کی جانب سے حفاظتی فیصلے انتہائی اہم ہوتے ہیں۔واقعے کے بعد طیارے کو معائنے کے لیے گراؤنڈ کردیا گیا، جبکہ مسافروں کو متبادل پرواز کے ذریعے ان کی منزل تک پہنچانے کا انتظام کیا گیا۔
