اسلام آباد: فافن (فاؤنڈیشن فار ڈیفنس آف ڈیموکریٹک نیڈز) نے 2025 کے پہلے پارلیمانی سیشن کے دوران ارکان اسمبلی کی حاضری اور کارکردگی کا جائزہ رپورٹ جاری کیا ہے، جو 13 سے 23 جنوری تک جاری رہا۔
رپورٹ کے مطابق، اس سیشن میں ایوان کی 9 نشستیں ہوئیں، جن میں سے 36 ارکان نے تمام نشستوں میں شرکت کی، جبکہ 35 ارکان کسی بھی نشست میں شریک نہیں ہوئے۔سب سے زیادہ ارکان سیشن کی 9ویں نشست میں حاضر ہوئے، جہاں 241 ارکان (68 فیصد) نے شرکت کی۔ سب سے کم حاضری سیشن کی 5ویں نشست میں دیکھی گئی، جہاں صرف 117 ارکان (37 فیصد) موجود تھے۔ رپورٹ کے مطابق، 277 ارکان (82 فیصد) نے کم از کم ایک نشست میں بھی شرکت نہیں کی۔سیشن کی حاضری کی شرح میں خواتین ارکان کی شرکت مرد ارکان کے مقابلے میں زیادہ رہی۔ 96 ایم این ایز نے رخصت کی درخواست دی، جبکہ 181 ارکان بغیر باضابطہ درخواست کے غائب رہے۔مسلم لیگ ن، سنی اتحاد کونسل، اور پیپلز پارٹی کے ارکان کی اکثریت نے نصف سے زائد نشستوں میں شرکت کی۔ مسلم لیگ ن کے 13 فیصد، سنی اتحاد کونسل کے 8 فیصد، اور پیپلز پارٹی کے 11 فیصد ارکان نے تمام نشستوں میں شرکت کی۔
وقفہ سوالات کے دوران، جہاں 20 وزیروں کی حاضری درکار تھی، صرف 6 وزیروں نے تمام متعلقہ نشستوں میں شرکت کی، جبکہ 5 وزیروں نے کسی بھی نشست میں شرکت نہیں کی، اور 9 وزیروں نے کم از کم ایک نشست میں حاضری دی۔ وزیر ہاؤسنگ تمام نشستوں میں حاضر رہے، وزیر صنعت اور وزیر آئی ٹی کی حاضری 89 فیصد رہی، اور وزیر میری ٹائم افیئرز کی حاضری 78 فیصد رہی۔وزیراعظم نے صرف 2 نشستوں میں شرکت کی، جبکہ اپوزیشن لیڈر نے تمام نشستوں میں شرکت کی۔ سنی اتحاد کونسل اور مجلس وحدت مسلمین کے پارلیمانی لیڈرز نے تمام 9 نشستوں میں شرکت کی، جب کہ مسلم لیگ ن کے پارلیمانی لیڈر نے 6 نشستوں میں شرکت کی۔ پیپلز پارٹی، جے یو آئی، اور بی این پی کے پارلیمانی لیڈرز کسی بھی نشست میں شریک نہیں ہوئے۔
