سپیکر قومی اسمبلی سردار ایاز صادق سے بلغاریہ کی سفیر مسز ایرینا گانچیوا نے ملاقات کی، جس میں بلغاریہ کی جانب سے پاکستان کے 79ویں یومِ آزادی کی مبارکباد بھی پیش کی گئی۔
اقتصادی و پارلیمانی تعاون بڑھانے کا عندیہ
ملاقات کے دوران سپیکر قومی اسمبلی نے کہا کہ پاکستان بلغاریہ کے ساتھ اقتصادی اور پارلیمانی تعاون کو مزید بڑھانے کا خواہشمند ہے۔ تجارت اور سرمایہ کاری کے شعبوں میں دونوں ممالک کے درمیان تعاون کے وسیع مواقع موجود ہیں جنہیں بروئے کار لانے کی ضرورت ہے۔
تجارتی برادری اور ثقافتی تعلقات
سردار ایاز صادق نے دونوں ممالک کی تجارتی برادری میں رابطوں کو فروغ دینے کی اہمیت پر زور دیا اور کہا کہ ثقافتی اور تعلیمی شعبوں میں وفود کے تبادلے تعلقات کو مزید مضبوط بنا سکتے ہیں۔
پارلیمانی فرینڈشپ گروپ کا کردار
سپیکر نے بتایا کہ پارلیمانی وفود کے تبادلے سے دوطرفہ تعاون میں اضافہ ہوگا اور قومی اسمبلی میں قائم پاک-بلغاریہ پارلیمانی فرینڈشپ گروپ دوطرفہ تعلقات کو فروغ دینے میں ایک فعال کردار ادا کر رہا ہے۔
بلغاریہ کی سفیر کا موقف
بلغاریہ کی سفیر ایرینا گانچیوا نے بھی پاکستان کے 79ویں یومِ آزادی پر مبارکباد دیتے ہوئے کہا کہ پاکستان اور بلغاریہ کے درمیان عوامی سطح پر رابطوں کا فروغ خوش آئند ہے۔ انہوں نے مزید کہا کہ بلغاریہ کے سرمایہ کار پاکستان میں سرمایہ کاری میں گہری دلچسپی رکھتے ہیں اور پارلیمانی رابطوں کا فروغ دونوں ممالک کے بہترین مفاد میں ہے۔سفیر بلغاریہ نے سپیکر قومی اسمبلی کی جانب سے دوطرفہ پارلیمانی رابطوں کو فروغ دینے کے لیے اٹھائے گئے اقدامات کو بھی قابلِ تحسین قرار دیا۔
