پاکستان پیٹرولیم ڈیلرز ایسوسی ایشن نے اپنے مطالبات کی منظوری کے لیے حکومت کو 72 گھنٹے کا الٹی میٹم دے دیا ہے۔
ایسوسی ایشن کے رہنما ملک خدا بخش کا کہنا ہے کہ حکومت 72 گھنٹوں کے اندر پیٹرولیم ڈیلرز کے مسائل حل کرے، بصورت دیگر ان کے لیے پیٹرول پمپس پر کاروبار جاری رکھنا ممکن نہیں ہوگا۔انہوں نے کہا کہ پیٹرولیم مصنوعات کی قیمتوں میں روزانہ تبدیلی کو قبول نہیں کیا جائے گا اور حکومت کو قیمتوں کے تعین کے طریقہ کار پر نظرثانی کرنی چاہئے۔مزید برآں، ملک خدا بخش نے مطالبہ کیا کہ پیٹرول پر ڈیلرز کا مارجن بڑھا کر 8 فیصد کیا جائے اور کمپنیوں کی جانب سے عائد ایلوکیشن بھی ختم کی جائے۔
انہوں نے بتایا کہ پیٹرولیم ڈیلرز حکومت سے رابطے میں ہیں، مگر ابھی تک ان کے مسائل کا حتمی حل نہیں نکلا۔ انہوں نے کہا کہ ان کا صبر کا پیمانہ لبریز ہو چکا ہے۔ملک خدا بخش نے بتایا کہ 72 گھنٹے کا وقت دینے کا فیصلہ ایسوسی ایشن کی ایگزیکٹو کمیٹی نے کیا ہے، جس کے بعد ملک بھر کے ڈیلرز کے اجلاس میں یہ فیصلہ لیا گیا ہے۔انہوں نے واضح کیا کہ اگر مطالبات تسلیم نہ کیے گئے، تو پیٹرول پمپس پر کاروبار جاری رکھنا ممکن نہیں رہے گا۔
