پاکستان ڈیزاسٹر مینجمنٹ اتھارٹی (پی ڈی ایم اے) نے پنجاب میں درجہ حرارت میں غیر معمولی اضافے اور ممکنہ ہیٹ ویو کے پیش نظر الرٹ جاری کر دیا ہے۔
پی ڈی ایم اے کے مطابق صوبے میں گرمی کی شدت 13 جون تک برقرار رہنے کا امکان ہے، اور اس دوران درجہ حرارت معمول سے 7 ڈگری سینٹی گریڈ زیادہ ریکارڈ کیا جا رہا ہے۔ترجمان پی ڈی ایم اے کے مطابق لاہور، فیصل آباد، گوجرانوالہ، راولپنڈی، ملتان، بہاولپور، سرگودھا، ڈیرہ غازی خان اور ساہیوال سمیت دیگر اضلاع شدید گرمی کی لپیٹ میں ہیں۔ خاص طور پر جنوبی پنجاب میں ہیٹ ویو مزید شدت اختیار کر سکتی ہے۔
درجہ حرارت کی صورتحال:
گزشتہ روز ڈیرہ غازی خان اور نورپور تھل میں 49 ڈگری سینٹی گریڈ جبکہ بھکر، بہاولنگر، کوٹ ادو، منڈی بہاؤالدین اور دیگر علاقوں میں 47 ڈگری سینٹی گریڈ ریکارڈ کیا گیا۔
حکومتی اقدامات:
ریلیف کمشنر پنجاب نبیل جاوید نے تمام کمشنرز اور ڈپٹی کمشنرز کو الرٹ رہنے کی ہدایت کی ہے۔ عوامی مقامات، ٹرانسپورٹ اڈوں اور منڈیوں میں ٹھنڈے پانی کی فراہمی کو یقینی بنایا گیا ہے، جبکہ چولستان کے اضلاع میں صاف پانی کی دستیابی کے اقدامات مکمل کر لیے گئے ہیں۔
تمام ہسپتالوں میں ہیٹ ویو کاؤنٹرز قائم کر دیے گئے ہیں، جہاں ضروری ادویات بھی دستیاب ہیں۔
ڈی جی پی ڈی ایم اے عرفان علی کاٹھیا نے عوام کو مشورہ دیا ہے کہ:
غیر ضروری طور پر گھر سے باہر نہ نکلیں،
دھوپ میں مشقت اور سخت ورزش سے گریز کریں،
ہلکے رنگ کے سوتی کپڑے پہنیں،
بچوں، بزرگوں اور بیمار افراد کا خاص خیال رکھیں،
اور میڈیا کے ذریعے فراہم کردہ ہیٹ ویو سے بچاؤ کی ہدایات پر عمل کریں۔
پی ڈی ایم اے کی جانب سے شہریوں کو موسمی صورتحال کے بارے میں باخبر رہنے کی ہدایت کی گئی ہے۔
